Tillitat nassaarineqarput

Politiit unnuaq Århusimi angut 22-nik ukiulik tigusaraat, ippassarlu unnukkut arnat marluk 19-nik 46-nillu ukiullit, angullu 25-nik ukiulik, Horsensip eqqaani Hovedgårdimi, tassa tilliffiusup ungasinngisaani, tigusaralugu. Ippassarli politiit nalunaarutigaat imerfiit nassuttut ilusillit kuultimik sanaat, nanorlu sukkuusamik, tassa ravimik sanaaq, nassaarineqareersut. Ullumili paasitinneqarpugut ujammit kuultimik sanaat, 4-500-kkut nalaani sanaat, ataasinngormat aamma tillinneqartut, suli nassaarineqanngitsut, taamaammat politiit ilimagaat tillinniat tigusarineqareersut ilaqarsimassasut. Tassa tillitat sisamat ilaat pingasut nassaarineqareersut politiit oqaatigaat, allamilli oqarusunngilluinnarlutik, immaqa tillinniarnermut tunngasut tamaasa suli paasisimanginnamikkit, soorlu Hovedgårdimi tigusarineqartut pingasut, sumerpiaq najugaqarnersut suli paasineqanngilaq, biilillu ataasinngormat tillinniarnerup nalaani takuneqarsimasut suli qanoq tillinniarnermut attuumassuteqarnersut paasineqanngillat. Sulilu tillinniarnermut attuumassuteqartut tamaasa paasineqartinnagit politiit allamik oqarusunngilluinarallarput.

Tigusarineqartut sisamat Koldingimi eqqartuussivimmi Nunatsinni ullup qeqqartoq killisiorneqarput.