Tillissimasutut eqqartuunneqarpoq
Inatsisartuni ilaasortaasimasoq, Jensine Berthelsen, Sisimiuni hotelimi tillissimasutut Sisimiut eqqartuussivianni eqqartuunneqarpoq, aserorterisimasutulli pinngitsuutinneqarluni. Eqqartuussineq pivoq januaarip 18-anni, Jensine Berthelsenilu tillinniarsimasutut eqqartuunneqaraluarluni pineqaatissinneqassanngitsoq, eqqartuussivik aalajangerpoq.
Ukioq ataaseq qaangiuppoq Jensine Berthelsenip igalaaq aserorlugu Hotel Sisimiunut isermat, isereeramilu hotelip saaffiginnittarfiani viinnimik imigassanillu tigusilluni.
Jensine Berthelsen aserorterisimasutut pinngitsuutinneqarpoq, eqqartuussivik isumaqarmat taama iliornera allatut iliorsinnaannginnermik pissuteqartoq. Eqqartuussinerup ingerlanerani Jensine Berthelsenip oqaatigaa arlaleriarluni sianertarlunilu kasuttortarsimagaluarluni, kinguneqanngitsumilli.
-Iluaraara aserorterisutut pinngitsuutinneqarama, tillissimasutullu eqqartuunneqarnera tusaatissatut tiguara, oqarpoq.
Jensine Berthelsen Sisimiuni iliuutsini pissutigalugit Inatsisartuni ilaasortatut tunuarpoq, oqarporli Atassutip kissaatigippagu Inatsisartunut qinigassanngorteqqinniarluni.
