Tillinniat Namminersorlutik Oqartussanut isiinnariaapput

Namminersorlutik Oqartussat allaffissuanni kalerrisaarutit iluaqutaarpiarunnaarput. Illorsuaq ippassaq tillinniarfigiteqqippoq kalerrisaarulli aallarsimanngilaq.

Ippassaq tillinniarneq ilanngukkaanni Namminersorlutik Oqartussat allaffissuat sapaatit akunnerisa tallimat ingerlanerinnaanni pingasoriarluni tillinniarfigineqarpoq.

- Tillinniarnerni taakkunani pingasuni tillinniartoqalerneranut kalerrisaarut aallartarsimanngilaq, taamaammat tillinniat iluarisannguaminnik iliorsinnaasimapput, politiit nalunaarput.

Ippassaq tillinniarnermi Inuussutissarsiornermut sulisoqarnermullu Aqutsisoqarfimmi nalilinnik tillittoqarsimavoq.

Oktobarip 24-iani Namminersorlutik Oqartussani sillimaniarnermut pisortaq Daniel Gottrup neriorsuigaluarpoq sillimaniarneq misissoqqinniarlugu.

- Maanna misissortariaqalerparput qanoq iliorluta Namminersorlutik Oqartussat allaffissuat pitsaanerusumik isumannaallisarsinnaanerlugu. Maanna pasinarsivoq ullumikkut sillimaniarneq naammanngitsoq, Daniel Gottrup Namminersorlutik Oqartussat sapaatit akunnerisa tallimat matuma siorna siullermik tillinniarfitimmata KNR-imut oqarpoq.

Taama oqaluttoqaraluartoq tillinniat marluk suli kinaassusersineqanngitsut Namminersorlutik Oqartussanut marloriarlutik uani sapaatip akunnerani tillinniartarsimapput tamatigullu kalerrisaarut aallartarsimanngilaq.

Oktobarip 23-iat tillinniartoqarmat allaffinni arlalinni pappiaqqat isertuussat assanneqarsimapput. Uanili sapaatip akunnerani tillinniat nalilinnik ujarlersimapput maannalu eqqumiitsuliat pinnersaatillu akisuut tammaaneqarput.

Politiit maanna ujarpaat angutit marluk tillinniarnernut kingullernut attuumassuteqarsinnaasut.

Angutip takuneqartup aappaa kalaalerpasippoq, 20-t 25-llu akornanni ukioqassangatinneqarluni, 160 centimeterit missaannik angissuseqarpoq, tuattuulluni, taartunik nujaqarpoq amitsukujuumik takkajaamik kiinaqarluni. Aappaluttumik iluatigut kavaajaaraqarpoq, saattumik, qiviunik oqorsaasikkamik, qaavatigut qaatigooqarluni, qaamasunillu qarleqarpoq.

Aappaa aamma kalaalerpasippoq, 160 centimeterit missaannik angissuseqarluni. Taanna taartunik atisaqarpoq, naatsumik nasartalimmik kavaajaqarluni.

Kalaallit sanalugaannik, pinnersaatinilluunniit kuultimik sanaanik, akikitsunnguanngorlugit neqeroorfigitissimagaanni pisisimagaanniluunniit Nuummi Politiinut saaffiginnittoqarsinnaavoq, oqarasuaat 32 14 48 atorlugu, politeeqarfimmulluunniit nammineq saaffiginninnikkut.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat