Tillinniat isertitsivimmi juullisiussapput
Namminersorlutik Oqartussat allaffeqarfianni, qaammatit pingasut matuma siorna tillinniartoqarmat, angutit inuusuttut marluk pasineqarlutik tigummigallagassanngortinneqarnerat maanna pingajussaannik sivitsorneqarpoq, tassa sapaatit akunnerinik sisamanik sivitsorneqaqqikkami.
Allattoq Kristine F. Petersen
decembarip 22-at 2011 06:18
Lars Bo Jensenip politiineersup oqaatigaa, suliap misissorneqarnera maanna naammassisimalersoq, angutinullu marlunnut unnerluutiginnissutissaq juullip kingorna suliarineqassasoq, Nuullu Eqqartuussiviani qanoq unnerluutigineqassanersut tusarliunneqassalluni.
Suliaq ukiortaap kingorna eqqartuussivimmi suliarineqassaaq, tassanilu angutit inuusuttut taakku marluk unnerluutigineqarumaarlutik. Suliami tassani allanik pasisaqannginnerarlutik Lars Bo Jensenip politiineersup aamma oqaatigaa.
Namminersorlutik Oqartussat allaffeqarfianni tillinniarsimasutut angutit inuusuttut taakku pineqaatissinneqassagunik, pineqaatissinneqarsimasunut inissiisarfimmiittussanngortitaanissartik naatsorsuutigissavaat.
