Qaqortoq: Tillinniartoqartarnera piniartup qatsulluinnarpaa

Taarsiarsaartalermanaasiit Qaqortumi angerlarsimaffinnut, aalisartut toqqorsiviinut allanullu tillinniarnerit imaaginnavipput.

Ippassaq ullup ataatsip ingrlanerinnaani tillinniarnerit tallimat politiinut nalunaarutigineqarsimapput. Aalisartoq toqqorsivimmini tillinniarfigitittuartoq tillinniarfigitikataavippoq.

Aalisartoq piniartorlu Gerhardt Jakobsen ippassaq atortuusivimminut uunga iserami tillinniartoqaqqissimasoq paasivaa.

-Ajorpoq, ajuuilluni ajorpoq tujorminarpoq. Annilaanganarpoq patruunerpassuit tigusimagamikkit. Arlaatigut ulorianartoqarpoq.

Aatsaalli tilliniarfigitilinngilaq.

-Oqarsinnaavunga ukiut tamangajaasa tillinniarfigitippugut uagut tassani. Uanga arlaleriarlunga uani tilliniarfigitippunga. Siornakkunni ukiut tulleriit. Aamma massakkut aallarteqqipput.

AAMMA ATUARUK Tillinniarnerit pillugit paasiniaarnermi politiit ikioqqusut

Tillinnialli kingulliit aallaasinik pilerigisaqarsimapput.

-Uanni qoorortuuaraq, taavalu aallaasip puua patruunerpassuarnik imalik. Taava sanilinni uani qoorortuuaqqat sakkortunerit marluk. Aallaasit, annermik aallaasit. Aallaasinik tigooraasarput. Uuminartaqaat.

Qaqortumi politiit isumaqarput aalisartut piniartullu toqqorsiviinni tilliniarneit sapaatip akunnerata naanerani pisimassasut. Taamaammat tillinniarnerit paasineqarnissaat anguniarlugu Qaqortumi innuttaasut politiinit ikiortiserineqarput.

Paasissutissiisinnaasut pasitsaassaqartullu kujataani politiinut oqarasuaat 701122 atorlugu saaffiginneqquneqarput.

Aalisartullu peqqumaasivitik isumannaallisarnerusariaqassavaat.

-Toqqorsiviit makkua ammartertaramikkit. Ullut arlaani arlaa, ullut arlaani arlaa. Taamak ilioqattaartaramik.

Aalisartulli kisimik ulluni makkunani tillinnianik ajornartorsiuteqanngillat. Angerlarsimaffiit inoqannginnerini, soorlu, isiginnaarutit fladskærmit aamma tillinneqartarsimaput.

Tillitanik pisinerup pineqaatissinneqarnermik kinguneqarsinnaanera kujataani politiit aamma erseqqissaassutigaat.

-Mannaluunniit isiginnaaruteqartuuguni ajunnginnerpaassagaluarami. Maani saqqumisumik isiginnaarutilerlugu. Peqartuuppat ajunnginnerpaasagaluarpoq- Taava kikkuusut nassaarineqapallattassagaluarput.

Ilanngutassiami soorlu taaneqareersoq Qaqortumi ulluni kingullerni tillinniaqattaartoqarneranut ilisimannissinaasut kujataani politiinut oqarasuaataat 701122 sianerfigalugu saaffiginnittoqarsinnaavoq.