Tillinniarnerit persuttaanerillu politiinik ulapaartitsisut

Persuttaasoqarneranik suliat marluk politiit sapaatip akunnerata siuliani pinerluttuliornernut nalunaasiaminnut ilanngussimavaat. Aammattaaq niuertarfimmi Sparimi Qinngutsinniittumi kiliortortakkanik amerlasoorsuarnik tillinniartoqarnera suliaasa ilagisimaat. Angut 22-nik ukiulik sapaatiummat unnukkut nal. 21.20 niuertarfimmut iserpoq, sulisullu arajutsisillugit karsi kiliortortakkanik imalik tigusinnarlugu anilluni. Angut 22-nik ukiulik sulisunit ilisarineqarpoq, politiillu angalaartillutik nal. 03.30 inuusuttut allat pingasut biileqatigigai tigusarineqarpoq. Kiliortortakkat biilimittut aamma nassaarineqarput.

Angutip 16-inik ukiullip qamuteralaat blok 10-p eqqaaniittut pileritsaallugit aallarussimavai. Kammalaatini peqatigalugit angalaarsimavoq, innuttaasullu arlaata ingasagilerlugit politiit sianerfigalugit kalerrisimavai. Qamuteralaat umiarsualiviup eqqaani qimanneqarsimasut nassaarineqarput, ungasinngisaanilu angut 16-inik ukiulik aamma naammattoorneqarluni.

TELE-mut Hotel Hans Egedemullu tillinniarnerit marluusut paasiniaaffigineqarnerinut atatillugu paasissutissanik ujartuisoqaqqippoq. Politiit tassunga atatillugu saaffiginnissutinik arlalinnik pissarsisimapput, tillinniartulli tigusarineqarnissannut malitassanik suli amigaateqarlutik.