Assi: Rigspolitiet

Tillinniaq innuttaasunit unitsinneqartoq

Ilulissani innuttaasut eqeersimaartut marluk tillinniaq unitsissimagaat, politiit ilisimatitsipput.

Innuttasut marluk angummik, atisanik imalimmik puussiaaserluni pisuttumik ippassaq pingasunngornermi naammattuuisimapput. Innuttaasut isumqarsimapput atisat taakku Pilu Sportimi marsip 24-ani tillinniartoqarnerani tillitaasut, politiit tusagassiuutinut allapput.

Innuttaasut marluk angutip atisat nassatai Pilu Sportimi tillitaasut nassuerutigitissamavaat.

Innuttaasut politiinut attaveqarsimapput tillinniallu kinaanera qanorlu isikkoqarnera oqaluttuaralugu. 

Kingorna politiit tillinniaq tigusarisinnaasimavaat tillinniallu pinerlunnini nassuerutigisimallugu. 

Kingunerisaanik illoqarfimmi najugaqarfiit arlallik misissuiffigineqarsimapput, maannalu tillitat amerlanerpaartaat piginnittuanut tunniunneqariaannanngortut politiit ilisimatitsipput.

Angut tillinniarsimasoq killisiorneqareerluni ulluni 28-ni tigummigallagassanngortinneqarsimavoq.

Ilulissani tillitanik tuniniaasoqarsinnaanera politiit mianersoqqussutigaat, oqaatigalugulu tillitanik pisineq pineqaatissiissutigineqarsinnaasoq. 

Ikioqatigiinnikkut pinerlunneq akiorneqarsinnaavoq

Innuttaasut marluk tillinniaq inussiarnersumik attavigalugu nassuertissinnaasimammassut politiit nersualaarinnipput. Nukersortoqaranilu siorasaarisoqarsimanngilaq, taamaattoq aalajangersimarpalaartumik innuttaasut iliuuseqarsimallutik. 

- Inuiaqatigiit ikioqatigiinnerisigut pinerlunneq pitsaanerpaamik akiorneqarsinnaavoq, taamaaliornikkut pinerlunnerup akuersaarneqannginnera takutinneqartarmat, politiit allapput. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat