Tillinneq malugeqqunermik patsiseqartarpoq

- Pisiarfinni tillinnerit pillugit kisitsisit appariartuinnarput, taavalu tillinniarnerit allat, soolu angerlarsimaffinnut suliffeqarfinnullu, ukiuni kingullerni amerliartuaarusaarput, Jakob Fencker Noahsen oqarpoq.

Meeqqat inuusuttullu pisinarfinni tillissimatillugit politiit suliaqarneranni marluinnarni Nuummi meeqqat inuusuttullu najortagaannukarlutik pinaveersaartitsisartut ukioq una naalersoq tamakkerlugu najuupput. Siorna aamma taamaappoq.

Taakkualu ukiut tallimat arfinillit matuma siornarnit ikinneroqaat, taamani sulianut 50-it missaannut najuuttaramik.

Tassalu pinaveersaaartitsisartut pisiniarfiutilinnit pitsaanerusumik misigisaqarput.

Nuummi pisiniarfiutillit, Brugsen Kamillu, oqarnikuupput, tillittartut tassaasut meeqqat, inersimasut utoqqaanerillu. Nuummi politiit tillittoqarsimaneranik nalunaarutiginninnerit 426-it 2009-mi suliaraat. Siorna 512-riarluni nalunaarutigittoqarpoq.

Meeqqat inuusuttullu pisinarfinni tillittut ikiliartornerat peqatigitillugu meeqqat inuusuttullu illunut iserlutik tillittut amerliartorput. Siorna aqqanillit politiinit suliarineqarneranni pinaveersaartitsinermik suliallit najuupput. Ukioq mannalu imaliinnartoq arfineq pingasungoreerput.

Kisianni meeqqat tillitarnerannut pissaaleqineq peqqutaanngitsoq, Jakob Fencker Noahsen isumaqarpoq.

- Meeqqat inuusuttulluunniit inersimasunit avatangiisiminnit iluamik sammineqartanngitsut, nukissaqarfigineqarpallaanngitsut piffissaqarfigineqarpallaanngitsullu pinerlunniarnermut uteqqiattarput, Jakob Fencker Noahsen oqarpoq

Tillinniartarnerannullu imigassamut ikaroornartumullu akissaqalerniarlutik siunertaasartoq Jakob Fencher Noahsen oqarpoq.

Meeqqat inuusuttullu inatsisaatsuliornissamiit ungavarsimatinniarlugit, kommunip sulisuinit assigiinngitsunik sammisaqartinneqartarput. Sisorarneq, nalunneq, nunamut pisunneq, pinialunneq aalisarnerlu assersuutissaalluarput.

- Imminnut naammagisimaaleraangamik pinerlunniarnermut ungasinnerulertartut malunnarpoq. Meeqat inersimasunit sammineqaleraangamik, pimoorunneqarlutillu paasigaangamikku, taava toqqissisarput nuannersumillu kiinnersalertarlutik.

Meeqqat inuusuttullu Nuummi uteqqiattumik pissuseqarlutik assigiinngitsunut tillinniartartut amerlanngitsut, Jakob Fencker Noahsen-ip oqaatigaa, 20-it 30-illu akornanniinnerarlugit.