Tillie Martinussen Suleqatigiisitsisullu siulersuisuuneri parteeqatiminnit aningaasanik partiimut attuumassuteqanngitsunik atuinerarneqarlutik saassunneqarput.Assi: KNR / Malik Brøns

Tillie Martinussenip atornerluinerarneqarnini saassussinerlunnertut nalileraa

Aningaasanik atuinerit tamarmik partiimut attuumassuteqartut siulersuisuunerillu akuersissutiginikuugaat, Tillie Martinussen oqarpoq. Taanna Suleqatigiisitsisut aningaasaataannik atornerluisimanerarneqarpoq.

- Innuttaasut akileraarutaat nappatigaakka. Pukutsukkut pillittoornikuunermit anniartualernikuuvunga, qitikkullu suligaangama anniarajuttunngornikuullunga, Suleqatigiisitsisut siulittaasorigallagaat, Tillie Martinussen partiimut tapiissutit pillugit oqarpoq.

Tillie Martinussen Suleqatigiisitsisullu siulersuisuuneri aningaasanik partiimut attuumassuteqanngitsunik atuinerarneqarlutik parteeqatiminnit saassunneqarput.

Suleqatigiisitsisut Kommuneqarfik Sermersuup immikkoortortaqarfiata siulersuisuini amerlanerussuteqartut partiillu naatsorsuuserisorisimasaa Jan Joe Seidsen isornartorsiuisuupput. Jan Joe Seidsen akerliulluni partiip siulersuisuunerinit oktobarip qaammataani tunuarpoq.

AAMMA ATUARUK Flytning, allergi og stresscoach: Det handler striden i Samarbejdspartiet om

Aningaasat akileraartartut akiligaat Tillie Martinussenip nammineq aningaasartuutiminut atortarai taakku isumaqarput.

Ilaatigut Tillie Martinussenip inimut allamut nutserneranut 14.000 koruunit missaanniittut partiip akilerpai, sapigaqarnermullu suliaritinnermut Laserklinikimut Nuummiittumut 3.654 koruunit siorna akilerneqarlutik.

Suleqatigiisitsisunut partiimut tapiissutit

Partiimut tunngaviusumik tapiissutit ilaasortaatitaqarnermullu tapiissutit pingaarnertut isertitaapput.

Suleqatigiisitsisut aningaasaataat ukiumut 1,1 millionit koruunit missaanniipput.

Partiimut ilaasortat akiliutaat 2.725 koruuniupput.

Paasisat: Suleqatigiisitsisut 2019-imi naatsorsuutaat

Tillie: Aningaasat atornerlunneqanngillat

Tillie Martinussenip aningaasanik atornerluisanngitsutut oqarnera siulersuisuunerit taperserpaat.

- Saassussineq qanoq aaqqissornerlugaatiginersoq tassani takuneqaannarpoq. Isumaqartut isikkorissaanerinnamik suliaqartartut, taamaanngilarli.

- Tagiartuinissamut aamma neqerooruteqartarput, timimik sungiusaasumut aamma akiliisoqarnikuuvoq. Tamanna partiip aningaasartuutigissagaa isumaqarpugut, tassami allatut ajornartumik taqqamani sulisariaqarpunga, partiip Inatsisartuni ilaasortatuaa Tillie Martinussen oqarpoq.

Inatsisartuni ilaasortamut sinniisoq aggersarneqassappat, ilaasortaq napparsimanermut atatillugu ullut 14-it sinnerlugit sulinngiffeqassaaq. Tillie Martinussenilu inatsisit taakku malillugit suliinnassaguni tagiartortittariaqartarlunilu timimut sungiusaasumiittariaqartarsimanerarpoq.

Taakkua saniatigut Tillie Martinussen sapigaqarami Inatsisartuni sulinermini anillattoortarpoq. Tamakkulu tamaasa suliami matumani uppernarsartariaqarneri uggorai.

- Nakorsap nalunaarsugai ajornerpaaffinnilu assit Facebookimut ilisariaqarsimavakka. Takutinniartariaqarsimavara sapigaqarlunga, inuit malersuisut upperineqalersimammata, Tillie Martinussen oqarpoq.

AAMMA ATUARUK Suleqatigiissitsisuni siulittaasoq suli paatsuungassutigineqartoq

Inatsisartuni sulinermi atugassarititat kingunerisaannik suliaritinnernut aningaasartuutaammata siulersuisuunernit akuerineqarsimasut siulersuisuunerni ilaasortaq Kim Lyberth KNR-imut siusinnerusukkut nassuiaavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat