Tillie Martinussenip taaguut ´Naalakkersuisoq´ naalakkeerpalaarpallaartumik aalajangiisoorpalaarpallaartumillu aallaaveqarsoraa. Taamaammat ´Kiffartuussisoq´-mik taarserneqassasoq siunnersuutigaa.Assi: KNR / Malik Brøns

Tillie Martinussen: Taaguut Naalakkersuisoq kiffartuussisumik taarserli

Inatsisartuni ilaasortap Suleqatigiissitsisuneersup taaguut Naalakkersuisoq atorunnaassasoq, Inatsisartut ukiakkut ataatsimiinnissaannut siunnersuutigaa.

- Taaguut "Naalakkersuisoq" atorunnaarlugu "Kiffartuussisoq"-mik taarsissasoq, Suleqatigiissitsisut siunnersuutigaat.

- Naalakkersuisuni ilaasortatut Inatsisartunit toqqakkat innuttaasunut naqisimanninnatik kiffartorlutilli sullissisuunerat ersersinniarlugu, ´Kiffartuussisoq´-mik taaguuteqalernissaat siunnersuutigaara.

Suleqatigiissitsisuneersoq, Tillie Martinussen, Inatsisartut ukiakkut ataatsimiinnissaannut siunnersuummini taama allappoq.

Taassuma taaguut ´Naalakkersuisoq´ naalakkeerpalaarpallaartumik aalajangiisoorpalaarpallaartumillu aallaaveqarsoraa. Taamaammat ´Kiffartuussisoq´-mik taarserneqassasoq siunnersuutigaa.

- Taaguummik allannguineq innuttaasut qinikkallu naalakkersuisutut atuuffiup taakkununnga maninguuttuunissaannik piumasaqaatitaqarneranik innuttaasunillu sivikikkajuttumik kiffartuussiffiuneranik eqqaasitsissutaasinnaavoq, Tillie Martinussen allappoq.

Taaguut atorunnaarsikkiartuaarneqassasoq siunnersuutigigaa

Tillie Martinussenip taamaaliorneq pisortanut aningaasaqarnikkut allaffissornikkullu akisussangatinngilaa.

- Siunnersuutip piviusunngortinnissaa aningaasartuuteqarfiungaarnavianngilaq, allaffissornermillu suliaqartunut piffissaajaataangaarnavianngilaq, soorlu nittartakkakkut nutarterinikkut, matuni allagartalersuinikkut, nutaanik naqitsiseqalernikkut, allakkat qulequtaannik assigisaannillu allannguinikkut, Inatsisartuni ilaasortaq allappoq.

Allaffimmi atortuutigineqareersut allagaatillu naqitaareersut ´Naalakkersuisoq´-mik allannillit eqqarneqassanngillat. Nungutserlugilli atorneqassapput, atorunnaarsikkiartuaarneqassallutillu.

Allagaatilli nutaat ´Kiffartuussisoq´-mik allannilersorneqassapput.

- Allagaatinik asuliinnaq eqqaasoqarnissaa, tamannalu ilutigalugu avatangiisinik innarliinermik kinguneqartumik pisariaqanngitsumik aningaasartuuteqarnissaq ingalanniarlugit taama siunnersuuteqarpunga, taanna allappoq.

Siunnersuut Inatsisartut ukiakkut ataatsimiinneranni novembarip ulluisa 24-anni oqaluuserineqassaaq.

Inatsisartut ukiakkut ataatsimiinnerat septembarip ulluisa 25-anni aallartissaaq. 

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat