Tillie Martinussen: Siunnersuisarfiliussaagut
Siunnersuisartut angalasartut ilinniagalinnik, soorlu isumaginninnikkut siunnersuisartunik aqutsinikkut misilittaqagartunik, psykologinik meeqqanik inuusuttunillu sullissinnermik sammisalinnik kiisalu politiinik inatsisilerinikkut ilinniagalinnik. Taamaaliornikkut siunnersuisut angalasartut piffissap sivisunerusup iluani ilisimasatik atorlugit sulisunik pikkorinnerulersitsissapput.
-Piffissami sivisuumi suliniutit assigiinngitsut ingerlassimavagut. Kommunini ilinniakkamik unitsitsiinnartartunut iliuusissanik ilitsersuisoqartitsinerillu ingerlanneqarnikuupput, namminersorlutik oqartussaniillu inuusuttunut bootcampit ingerlanneqarsimallutik. Suliniutit tamakku tamaasa ataqatigiissarneqarfissaannik maqaasisarpunga, aamma ilisimasat katersorneqartut tamanit iluaqutissanngortillugit tassani atorneqarsinnaapput suliniummi ataasiinnarmi atornagit. Ilisimasat susassaqarfimmi tassani katersorneqartut nunatta siunissaa eqqarsaatigalugu pigiinnarnissaat pingaaruteqartupilussuuvoq, Tillie Martinussen isumaqarpoq.
Siunnersuisartut angalasartut atornerisa iluaqutissartaat tassa immikkut ilisimasaqarluartuunertik tunngavigalugu meeqqat atuarfiini aqutsisunik, ilinniartitsisunik, perorsaasunik kiisalu inersimasunik sunngiffimmi suliaqartartunik taamaaqataanillu ilitsersuisarnissaat, tassa sulinerminni ”ilitsersuussisunik ilinniartitsisunillu sanileqarlutik” ulluinnarni sulinerminnik pitsaanerulersitsisalernissaat. Peqatigisaanik angalatitat angerlamut uteraangamik ilisimasaannik katersuivittut siunnersuisarfik Kommuninit Namminersorlutik Oqartussanillu atorneqassaaq.
-Siunnersuisarfimmi atorfeqartussat kalaallisut oqalussinnaanissaat pingaaruteqartupilussuuvoq, meeqqammi sullinniakkat ilarpassui immaqa ilitsoqqussaralugu oqaatsimik saniatigut oqaatsit allat atorlugit tamakkiisumik oqalussinnaanngillat. Kalaallit tarnip pissusaanik ilisimasallit, isumaginninnermi siunnersortit inatsisilerituullu ilinniarluarsimasorpassuupput, immaqalu angerlarnissaminnut nunatsinnilu piginnaasaminnik nunatsinnut iluaqutaasussamik tunniusserusuttut uternissaminnik kajumilersinneqarnissaminnik amigaateqaannartut. Taakku qammarniarsarisariaqarpagut. Siunnersuisarfiup ingerlanneqarnera ukiumut 5 mio. kr.-it miss. akeqassaaq, aningaasallu taakku aningaasanut inatsimmi "Meeqqanut inuusuttunullu immikkut suliniutit" ataanni nassaarineqarsinnaapput, tassanimi 2010-mi 7 mio. kr.-it 2011-milu 8 mio. kr.-it atorneqanngitsoorsimapput, Tillie Martinussen knr.gl-imut oqarpoq.
