Martinussen: Kiffartuussinissamik isumaqatigiissut Ataatsimiititaliamit paamaarunneqanngilaq

- Suliap paamaarunneqarsimaneranik Naalakkersuisup oqaasii, Aningaasaqarnermut ataatsimiititaliap ajuallaatigisimavaa. Taamaaliortoqarsinnaasimanngilarmi, Demokraatit sinnerlugit Aningaasaqarnermut Ataatsimiititaliami ilaasortaq Tillie Martinussen, KNR-imut oqarpoq.
Aningaasaqarnermut Ataatsimiititaliaq tusarniaavigineqaqqaareerluni kiffartuussinissamik isumaqatigiinniartoqarsinnaanissaa Naalakkersuisunut maajimiili suliakkiutigineqaraluartoq Tillie Martinussenip ilanngullugu oqaatigaa.
Angalasut aqqutissaaruttut akunnittarfinni unnuinermut billitsinullu akiliisariaqartannginnissaannut iluarsiissummik ujartuisoqartoq, Attaveqaqatigiinnermut naalakkersuisup Knud Kristiansenip oqaatigaa, Ataatsimiititaliarlu taama aaqqiisoqarniarneranik tapersersuivoq.
- Naalakkersuisut aaqqiissutissanik saqqummiussaqarnissaat kajumissaarpavut. Qeqertarsuup Tunuanut tunngatillugu aaqqiissutissat, Kujataanilumi aaqqiissutissanik saqqummiussaqaqqullutigit, ilaasunut nuna tamakkerlugu assigiimmik aaqqiisoqarsinnaanissaa ujartorlutigu, Tillie Martinussen oqarpoq.
Taamatullu aaqqiisoqarpat qanoq akeqassanersoq ilisimaneraat taanna aperaarput, imatullu akivoq:
- Naagga, naalakkersuisumut tamanna pillugu saaffiginnnittoqarnissaa isumaqatigiissutigaarput. Nutaamillu aaqqissuussisoqarnissaa akisuallaarnavianngitsoq ilimagaarput, Tillie Martinussen oqarpoq.
Angalasut amerlasuut sillimmasereerlutik angalasartut, taassuma ilaatigut oqaatigaa.
Inuit Ataqatigiit Inatsisartut Aningaasaqarnermut Akileraartarnermullu Ataatsimiititaliaannut ilaasortaatitaannit Aqqaluaq B. Egedemit oqaaseqartitsiniaraluaratta iluatsinngilarput.