Tikisitsinermi inatsisit malinneqarput
Nuup borgmesteria Agnethe Davidsen oqarpoq sanasut Polenimiut tikisinneqarneranni Nuup Kommunia sulisitsisup Greenland Ground Contraktors-ip avataaneersunit sulisussarsiornermut qinnuteqarneranut kommunimiit inatsit malinneqarsimasoq, kisiannili isumaqarluni inatsit ullutsinnut tulluussarneqartariaqartoq, tamannalu Inatsisartut suliassarigaat:
Ippassaq radioavisimi oqaluttuaraarput Polenimiut qulingiluat sulisinnaanermut akuersississuteqaratik Nuummi sanasutut sulitsisumi Greenland Ground Contractors-imi februaarip aallaqqaataaniilli sulisorineqartut.
Sulitsitisuusorli Leif Aagaard oqarpoq siorna ukiakkut Nuup kommunianut avataaniit sulisoqarnissaminut akuersissummik pisimagami februaarimi Polenimit sulisussaminik tikisitsisimalluni, aatsaalli tikereersut sulilereersullu sulisinnaanermut akuersissutinik qinnuteqarsimagamik maanna suliaq suli ingerlasoq.
Politiimesterip tullersortaa Bjørn Bay oqarpoq Polenimiut akuersissuteqaqqaarlutik sulilersinnaammata maannakkut sulinerat unioqqutitsinerusoq.
Nuuummi borgmesteri Agnethe Davidsen oqarpoq pisumi inatsisit malinneqarsimasoq:
- Inatsit tunngaviusoq, tassalu Kalaallit Nunaannut suliffissarsiortut killilersimaarnissaat pillugu Inatsisartut inatsisaat nr.27, 30. oktober 1992-imeersoq sulisitsisup avataaninngaanniit sulisussarsiortarneranut tunngasoq malillugu akuersissummik tunisisimavugut. Tassa oqarsinnavugut ajornanngitsumik sulisitsisuusoq avataaninngaanneersunik tikisitsisinnaavoq, Agnethe Davidsen oqarpoq.
Agnethe Davidsen aamma oqarpoq sulisistsisut sulisullu sulisinnaanermut allagartaqarnissaq akisussaaffigigaat.
- Oqarsinnaavugut ineriartornermi nunarsuarmioqatitsinnut malinnaalernikuugatta qularnanngitsumik siunissami naapittagarilissavarput nunanit allaninngarnit suliartortunik tikittoqartalernissaa, taamaattumik isumaqarpunga inatsit taanna misissorneqartariaqalersoq ullutsinnut naleqqussarlugu, tamannalu Inatsisartut suliarisussaassavaat, Agnethe Davidsen oqarpoq.
