Tikisitat pinnagit nunaqavissut atorlik
Jess G. Berthelsen oqarpoq sulisussanik tikititsiortornissaq paasiuminaatsikkini maani nunami massakkorpiaq inuit 1600-t suliffissaaleqimmata. – Taakku sulisinnaanngornissaat salliutinneqartariaqarpoq, Jess G. Berthelsen oqarpoq. Jess G. Berthelsenip paasiuminaatsippaa inatsimmik allanngortitsiniartoqalermat massakkut atuuttumi periarfissaqareermat immikkut atorfissaqartitsisoqartillugu tikisitsinissamut immikkut akuersissummik qinnuteqarsinnaaneq. – Killormut inatsit sukatertariaqarpoq maannakkut ajornanngippallaarmat tikisitsisoqartarnera, Jess G. Berthelsen oqarpoq nangillunilu Namminersornerullutik Oqartussat ilinniarnissamut ilinniaqqinnissamullu aningaasaliissuterpassui atorlugit nunaqavissunik ilinniartitsineq sakkortusarneqartariaqartoq.
Sulisitsisut kattufiata NUSUKA-p siulittaasua, Gerth Lynge ilaatigut oqarpoq, avataanit atorfinitsitat maani najugalinnik inagiinnginnissaat nakkutigeqqissaartariaqartoq. Alcoamullu tunngatillugu sinnattuaqinerusoq takorluussallugu aatsitsivissap sananeqarnerani sulisinnaasunik immikkut piginnaanilinnik maani najugalinnik 5.000-inik atorfinitsitsisinnaanissarput eqqartussallugu.
