Suleqatigiissitsisut: Tikisitat inuiaqatigiinnut akuliunneqarnerusariaqarput
- Nunanit allanit tikisitsinissamut ammanerusariaqarpugut, inuiaqatigiinnullu iluamik akuliunnissaannik qulakkeerinnittariaqarluta. Taamaalillutik oqaatsigut ilikkarsinnaagunikkit ilikkassavaat nunatsinnullu pitsaasumik ilanngussallutik, Suleqatigiissitsisunut pilersitseqataasoq, Tillie Martinussen oqarpoq.
Oqaatsinik pikkorissartitsinerit, tikerlaanut neqeroorutit isummanillu allanngortitsineq tikisitanik inuiaqatigiinnut akuliutsitsisinnaasutut Tillie Martinnussenip taavai.
Tikisitat inuiaqatigiinni oqallisigineqarajupput. Royal Greenlandip suliffissuarmini asiamiunik sulilersitsineranut atatillugu kingullermik oqallisigineqarlutik.
AAMMA ATUARUK Royal Greenland nunatsinneersunik sulilersitsisariaqarpoq
Asiamiunik sulilersitsineq SIK-p siulittaasuanit, Jess G. Berthelsenimit, najugaqavissut sulilersinneqarnissaannik kissaateqartumit, isornartorsiorneqarpoq. Tamannalu pillugu Tillie Martinusen ima oqarpoq.
- Soorunami nammineq sulisinnaasortavut sapinngisamik sulisinniassavavut. Kisianni assersuutigalugu nunatsinni illoqarfinni ineriartortuni suliffissaaleqisoqavinngitsoq takusinnaavarput, Tillie Martinussen oqarpoq.
Inatsit, ingerlatseqatigiiffiit tikisitsinissamut immikkut akuerineqarnissamik periarfissaqartitsisoq, Inatsisartut ukiaanerani ataatsimiikkamik atorunnaarsippaat.
Inatsisip taassuma oqaluuserineqarnerani, Siumut tikisitat qinersisinnaatitaanerannik killilersuinissamik siunnersuuteqarpoq, siunnersuulli tunuartinneqarpoq.
Tikisitat inuiaqatigiinnut akuliunnerutinniaraat
Partii Naleqqap siulittaasuata, Hans Enoksenip, ilaatigut aalisakkanik suliffissuarni kinamiunik sulilersitsineq arlaleriarluni isornartorsiorpaa.
AAMMA ATUARUK Suliffissaaleqisut pillugit sukaterisoqassasoq Enoksen isumaqarpoq
Suleqatigiissitsisulli nunatsinnut suliartortut pisariaqarsorigamikkit, tikisitsisarnermut akerliuneq kukkunerusoraat.
- Atorfinnut ilinniarsimasunit najugaqavissunit naammassineqarsinnaanngitsunut tikisitaqarnerugutta uagutsinnut pitsaanerussaaq, Tillie Martinnussen oqarpoq.