Tikeraat ornittagassaat piviusunngorsinnaanngortut
Inuussutissarsiornermummi naalakkersuisup, Vittus Qujaukitsup tikeraat ornittagaannik takornariartitsivinnillu pilersitsineq ingerlatsinerlu pillugit inatsisissatut siunnersuutaa Inatsisartut tamarmiullutik akueraat.
Nunatta inuussutissarsiutigisaani takornariaqarnerup qitiulernissaa Naalakkersuisut anguniarpaat. Tikeraallu ornittagassaat takornariaqartitsiviillu takornariaqartitsinermut pilersaarutaanni tunngaviupput.
Kommunilli suliamut peqataatinneqarnerunissaat inuussutissarsiornermut ataatsimiititaliap Naalakkersuisunut inassutigaa.
Kommunillu tikeraat ornittagassaannik takornariartitsivinnillu suliaqarnermi peqataatinneqarnissaasa pingaaruteqarneranut ataatsimiititaliamit oqaatigineqartumut Naalakkersuisut isumaqataasut, Vittus Qujaukitsup siunnersuutip aappassaaneerneqarnerani oqaatigaa.
Sumiiffinnimi ataasiakkaani takornariaqarnerup ineriartortinnissaa tikeraanut ornittagassaliornissap siunertaraa.
Naalakkersuisut takornariartitsinermi pilersaarutaat naapertorlugu tikeraat ornittagassaannik tallimanik Nunatsinni sanasoqassaaq, Ilulissallu Kangiat pillugu Ilisimatusarfittaassap taakkunani siulliunissaa pilersaarutaavoq.
