Tikaagulliusaat sivisunermik issittup imartaaniittarput

Cand. Scient. Malene Simon, Aarhus Universitetimi Ph.D-mut ilinniartutut atorfilik, misissuinermini Pinngortitaleriffimmiissimasup ilisimatusarneq ingerlassimavaa.

- Aasat tamaasa tikaagulliusaat 4000-it Kalaallit Nunaata kitaata imartaaniittarput, nunatta kitaa tikaagulliusaat neriffigisartagaraat pingaarutilik. Tikaagulliusaat Kalaallit Nunaata kitaata imartaa Ikersuarlu Davis neriffittuinnaq atortarneraat, qanorlu sivisutigisumik tamaaniittarnersut, sumilu nuliisarnersut, aatsaat paasineqarpoq.

- Tikaagulliusaat pillugit ilisimasat annikinnerannut peqqutaaqataavoq sinerissamut ungasittumiittarnerat, tamassumalu sakkortuumik anorlertarnera sikulu tamaaniittoq misissuinissamut aporfiusarsimammat, Malene Simon taama oqarpoq.

Aarhus Universitetimi Washington Universitetimilu suleqatini peqatigalugit tikaagulliusaat nipaannik immiussat atorlugit misissuisimapput qaqugukkut Ikersuaq Davisimiittarnersut tassanilu susarnersut misissorsimavaat.

- Tikaagulliusaat nipaat ukiut marluk ingerlaneranni immiunneqarsimapput, missiunerullu inerneri paasinarluarput: Tikaagulliusaammi Ikersuaq Davisimiittarput Decembarip naanissaata tungaanut, maannakkumut ilimagisamiit sivisunerujummik, Malene Simon nassuiaavoq.

Arferit kaperlannerani sulerisarnersut aamma immiussanit paasineqarpoq.

- Tikaagulliusaat Kalaallit Nunaata Canadallu akornanniinnerminni nuliullutik aallartittarput. Ullukkullu qaamalaarnerata nalaani nerisassarsiortarput kujammut aallannginnerminni, Malene Simon oqarpoq.

- Issittup imartaani, silap pissusaanik ilimasaarutit malillugit, siku annikinnerulerpat tikaagulliusaat sivisunermik tamaaniittalernissaat eqqarsaatersuutiginarpoq. Tikaagulliusaalluunniit kujammukartarunnaassanersut taamaasillutillu ukioq kaajallallugu avannaani nerisassaqarfiginerusaminniiginnartalissanersut takorloornarpoq, Malene Simon oqarpoq.

Ilisimatusarnermit paasisat uuliasiornissamut misissuinermut immallu uumasuinut silap pissusaata allanngoriartornera qanoq sunniuteqarneranut atorneqarluarsinnaasut Malene Simon isumaqarpoq.