Tikaagulliusaarniarneq unnuap qeqqaniit unitsinneqarallassaaq

Aalisarnermut, Piniarnermut Nunalerinermullu Pisortaqarfik ualigaa nalunaarpoq, Kalaallit Nunaata Kitaani tikaagulliusaartassat tamakkerneqarsimalermata tikaagulliusaarniarneq unnuaru unnuaqeqqaniit unitsinneqarallassasoq.
oktobarip 16-at 2007 15:42

Unitsitsigallarnermik oqarnermut pissutaavoq, tikaagulliusaartassanik suli allanik qulingiluanik pisassiisoqarnissaa Naalakkersuisut tallimanngorpat akuersissutigissagaat naatsorsuutigineqarmat, tassami tikaagulliusaat ukiumut 19-it Kalaallit Nunaanni pisarineqartarnissaat Arfanniarneq pillugu ataatsimiititaliarsuup, IWC-p, aalajangereermagu.

Tikaagulliusaat amerlassusaat ilisimaneqanngimmat tikaagulliusaartassat qulinut Naalakkersuisut namminneerlutik siorna ikilisippaat.

Piniarnermulli nalunaarsuutit Arfanniarneq pillugu ataatsimiititaliarsuup akuersissutigereerpai, taamaammat ilimagineqarpoq tikaagulliusaat 19-it ukioq manna pisarineqarnissaat Naalakkersuisut tallimanngorpat akuersissutigissagaat. Taama oqarpoq Aalisarnermut, Piniarnermut Nunalerinermullu Pisortaqarfimmi siunnersortaaneq, Ole Heinrich.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq