Tikaagulliusaaq ikkannittoq Vejlemut ussassaarutaalluarsimavoq
Tusagassiorfinni tusagassiassaaleqisoqartillugu, soqutiginartumillu tusagassiassaqartinnagu arfeq immamut ikkattumut ikkannittoq tusagassiorfinnut qujanaqaaq.
Danmarkimi nutaarsiassanik nalunaarsuisarfiup Infomediap naatsorsuinerata tamanna ersersippaa, taakkumi oqaatigaat tikaagulliusaaq tusaamasaq, aasaq manna Vejlep kangerluani toqusoq, qallunaat nunallu tamalaat tusagassiorfiini 2481-eriarluni taaneqarsimasoq.
Vejlemi borgmesteri Arne Sigtenbjerggaard tikaagulliusaamut ikkannittumut piffissaajarpallaarnerarlugu quiasuutigineqaraluarpoq. Tikaagulliusaarli pissutigalugu Vejlep akiliinngikkaluarluni oqaluuserineqarnerujussua ullumikkut nuannaarutigalugu, Vejlemi aviisimut Budstikkenimut oqaatigaa.
Infomediamit oqaatigineqarpoq, Vejle Kommunep tusagassiuutini sammineqarnerujussuartik nammineerlutik akilertussaasimasuuguniuk 35 millionit koruuninik akiilisimassagaluartoq.
Tikaagulliusaap saarngisa saqqummersinneqarnissaat maanna piareersarneqaleruttorpoq. Tassami neqaa nagguaatsup anaanut 20 tonsimut qaammatini marlussunni kininneqareernermigut asioreermat.
