Tikaagullinniartartut tikaagullinniarsinnaanngorput

Tikaagullinniartartut maanna tikaagullinniarsinnaalerput. Piniarnermut pisortaqarfiup Kitaani tikaagullittassat 169-inut amerlassusilersimavai.

Taakkunannga 132-t qamutilissortunut pisassiissutaapput, 37-illu ataatsimoorluni pisarineqarsinnaallutik – tassa umiatsiaararsortunit.

Tunumi tikaagulliit 15-it ataatsimoorluni pisarineqarsinnaapput.

Pisassat agguataarneqarnerat Aalisarnermut Piniarnermullu Pisortaqarfiup, KNAPK-p aamma KANUKOKA-p suleqatigiillutik aalajangersarsimavaat.

Qamutilittassiissutigineqartut 132-iusut angallatinut qamutilimmik tikaagullinniarnissamut akuerisaasunit, ukiunilu kingullerni pingasuni tikaagullinniarnermik ingerlataqareersunit tamanit, piniarneqarsinnaapput.

Taakkununnga pisassiissutigineqartut aggustip qiteqqunnerani pisassanik agguaassisoqaqqinnissaata tungaanut pisassiissutaapput – siornatigumulli sanilliullugu allaassutigalugu kommunini ataasiakkaani pisassanik amerlanerpaaffissaliisoqarmat.

Taamaalilluni Sisimiut aamma Maniitsoq amerlanerpaamik 20-nik pisassinneqarput, massa Nuuk aamma Qaqortoq amerlanerpaamik qulinik pisassinneqartut.

Kommunit sinneri qamutilinnik tikaagullinniarsinnaasut amerlanerpaamik tallimanik pisassinneqarput.