Tikaagullinniarneq aallarteriaannanngorpoq

Ukioq manna tikaagullittassat aalajangerneqarput.

Kitaani tikaagullittassanit 169-iusunit 132-it qamutilimmik tuukkartalimmi pisarineqarsinnaalerput, taakkunanngalu 37-t qoorortoorsorluni piniaqatigiinnit pisarineqarsinnaalerlutik, kiisalu Tunumi piniaqatigiinnermi tikaagulliit 15-it pisarineqarsinnaalersut, Aalisarnermut Piniarnermullu Pisortaqarfik KNAPK-mik Kanukokamillu ataasimeeqateqareerluni aalajangerpoq.

Qamutilimmik tuukkartalimmik tikaagullittassiissutit 132-iusut, angallatinut ukiuni kingullerni pingasuni tikaagulliarniartarsimasunut aammalu tuukkartalimmik qamutililinnut, piumasaqaatinik naammassinnissimasunut ukioq manna aggustip qiteqqunnerani agguaasseqqinnissap tungaanut paggatassiissutigineqartut, ukiunulli siuliinut sanilliullugu kommunini ataasiakkaani pisarineqarsinnaasut killilerneqartut, Piniarnermut Pisortaqarfik nalunaarpoq.

Killiliineq pissutigalugu, agguaasseqqinnissap tungaanut Sisimiut Maniitsullu kommuniini qamutilissortunut, immikkut tamanut 20-it pisassiissutigineqarput. Agguaasseqinnissap tungaanut

tikaagullittassat Nuup Qaqortullu kommuniini qulinut kommunillu sinnerini tallimanut killilerneqarput.

Qoorortoorsorluni tikaagullittassat 37-it kitaani Upernavimmiit Nanortalik ilanngullugu agguataarneqarput. Kommuneqarfinni ataasiakkaani pisassiissutit ataatsimiit tallimat tikillugit amerlassuseqarlutik.

Tikaagulliit siorna 2006-imi Kitaani qamutilissortunit katillugit 143-it pisarineqarsimapput qoorortoorsortunit 38-t pisarineqarsimallutik.

Tunumi siorna qamutilissortut tikaallittaqarsimanngillat qoortoorsortulli pingasoraarsimallutik.