Tikaagullik unnia silatuukasiusoq

maajip 05-at 2007 17:17

Tikaagulliit silatuujunerat qangali ilisimaneqarpoq, taamaakkaluartorli danskit ilisimatuuisa tupaallaatigisaminnik paasisaqarput. Tassamigooq tikaagulliup qarasaa 13 mia.-tinik qaratsami celle-nik peqarpoq. Tassalu imaappoq maannakkuugallartut paasisat najoqqutarissagaanni uumasuni tamani inuup qarasaata piginnaasaanut tikaagulliup qarasaa qaninnerpaasimavoq.

Ilisimatuussutsikkullu paasisaq tamanna nutaaq maanna amerikami ilisimatuussutsikkut paasisat kingulliit pillugit quppersakkamut anngunneqareersimasoq unnersiutigineqarpoq.

Tikaagulliit ilisimatusarfigineqarneranni tikaagulliit tallimat qarasaat misissuivigineqarsimapput.

- Tikaagulliit silatoorujussuupput, allaat sannatit sakkut qanoq atornissaat nalunngilaat, aammalu suleqatigiissinnaaneq kiisalu imminut ilisarisinnaaneq nalunagu, taamaattumik paasisarput tupaallaatigeqaarput, ilisimatusarnermi peqataasoq Nina Eriksen oqarpoq.

Taanna nangilluni nassuiaavoq, tikaagulliup qarasaa inuup qarasaaniit marloriaammik oqimaannerusoq, erseqqissaassutigaali qarasaa tikaagulliup timitaanut naleqqiukkaanni qarasaata mikivallaarnerunera.