Tiinganeq ajoqutaasoq
Nulukkut patitsinneq, oqaatsit atoqatigiinnermut tunngasut, imaluunniit atoqatigiinnissamik toqqaannartumik kajumissaarinerit, tamakkuupput ilaatigut erloqissutigineqartarlutillu sullivinni toqqissiunnaarsitsisartut.
Tamanna pillugu Grønlands Sygeplejeforbundimi Peqqissaasullu Kattuffianni siulittaasup Birtha Bianco-p kissaatigaa, peqqinnissaqarfimmi sulisut 450-t missaanniittut kattuffinni taakkunani ilaasortaasut nuna tamakkerlugu misissuiffigineqassasut.
Taamatut tiinganiarsaraluni erloqisitsineq itisuumik paasisariaqarpoq, tassami tarnikkut erloqissutaasinnaavoq sulinermullu ajoqutaasinnaalluni. Taamatut akornusersuineq tamatigut toqqorternikkut pisarpoq.
Taama misissuilersaalerneq pilerpoq, Danmarkimi peqqissaasut akornanni tamanna pillugu misissuisoqareernerata kingorna, inerneralu Birtha Bianco-p tupaallaatigisimavaa, misissuinermi 13 procentit akisimammata sulisunit allanit, napparsimasuniillu oqaluffigineqanngikkunik attorneqarfissarinngisamikkut attuuaneqartarsimallutik.
- Ukiuni sisamani siulittaasuuninni ilaasortat tamakkuninnga saqqummiussaqarneq ajoraluarput, kisianni tamanna isumaqartariaqanngilaq taama iliortoqartarsimanngitsoq, misissuinissamulli ikiuukkusuppugut, Birtha Bianco AG-mut taama oqarpoq.
