Tigussaanerusumik iliuuseqarnissaq IA-p ujartorpaa
- Takussaasunik atorsinnaasunillu allannguisoqassappat taava akileraartarneq ineqarnerlu pillugit aaqqissuusseqqittoqartariaqartoq isumaqarpugut, Naaja Nathanielsen oqarpoq imalu tunngavilersuilluni:
- Tassami sulerusussusermut kajumilersitsinissaq kissaatigaarput taamaalilluni aningaasat Nunatsinni iluamik agguataarneqarsinnaaneri anguneqassammat taamaalillunilu inuiaqatigiinnut tamanna iluaqusiissalluni.
Inuusuttut 18-iniit 34-t angullugit ukiullit suliffissaaleqinerujussui sakkortunerusumik qanoq iliuuseqarfigineqarnissaa, Inuit Ataqatigiinnit ujartorneqarportaaq.
- Tamanna qanoq iliuuseqarfiginngikkutigu ukiuni tulliuttuni amerlasuuni tamanna ajornartorsiutaassaaq. Taamaattumik tamanna erngiinnaq aaqqinneqartariaqarpoq.
Naalakkersuisut sukkut aalakoornartullu akitsuusissappatigit tamanna Inuit Ataqatigiinnit aamma ernummatigineqarpoq.
- Tamanna pilersinneqassappat Nunatsinni innuttaasut aningaasakinnerusut sakkortuumik eqqorneqartussaapput. Tamannami iluaqutaanngitsoq siusinnerusukkut takusareerparput. Taamaattumik neriuutigaarput tamanna Aningaasanut Inatsisip saqqummiunneqarnerani aamma eqqaamaneqarumaartoq, Inuit Ataqatigiit aningaasaqarneq pillugu oqaaseqartartuat, Naaja Nathanielsen oqarpoq.
