Irakimi paarnaarussivimmit tusaamanerlugaasumit, Abu Ghraibimit, tigusat 500-t ullumi iperagaapput.
Irakimiut eqqisseqatiginiarlugit tigusat amerlasuut ataatsikkut iperagaanissaat ministeriunerup Nuri al-Malikip tallimassaa naalakkiutigaa.
- Tigusat iperagaasut perullulioqqinniaratik neriorsuipput, Irakimilu eqqissillutik innuttaasunut akuliunniarlutik aamma neriorsuillutik. Qaartartumeerisaqattaartarsimasutut, aallarussisarsimasutut, naalliutsitsisarsimasutut toqutsisarsimasutulluunniit pisuutinneqanngillat, Irakimi tigusat atugarisaat pillugit oqaaseqartartuutitaq, amerikamiu, oberstløjtnant, Keir-Kevin Curry oqarpoq.
Tigusat iperagaasut amerlanersaat Bagdadip Ramadillu eqqaanni eqqissiviilliorfiusuneersuupput sunnisiortuullutillu. Alanngortaqanngitsumi issiatitaallutik inatsisartuni ilaasortamit sunnisioqatiminnit oqaaqqissaarfigitereerlutik bussinut ilaallutik iperagaapput.
- Inuiaqatigiinni inooqataallualerniassammata suliffissaannik pilersinissarput pisussaaffigaarput. Taamaaliunngikkutta pikititsisunit qujarunneqarlutik pinerluttuliorteqqinneqarataannaapput, ministeriunerup tullersortaa oqaaqqissaarnerup kinguninngua oqarpoq.