Tigusarinninnermik takunnittoq: Allaanngilaq filmimik isiginnaarluni

Tigusaasut tassaapput Sverigemeersut sisamat, Danmarkinngaannersorlu ataaseq. Taakku Københavnimi hotelimi Scandic Copenhagenimiitillutik politiinit ippassaq tigusaapput. Tillinniarsimasutut pasisat hotelip paarlersuani issiatillutik politiinit unguneqarput. Tillinniat tigusarineqarnerminni aningaasarpassuit nerriviup qaavaniitsissimavaat, isiginnittorlu David Qujaukitsoq elevatorinit anillaruttortilluni tigusaasunik takunnippoq:

- Sunaaffa tigusarinnittut nalaatsorluaavillugit anillattunga. Assut tupaallappunga politeeq sammisoq qaninaartoorlugu umiutingajammanga annilaajummertorujussuuvunga, David Qujaukitsoq, nangipporlu:

- Tusagassiorfiit kingusinnerusukkut misissorakkit paasivara Dansk Værdihåndteringimi milionilippassuarnik tillinniat tigusarisimagaat. Nutaarsiassanilu filminilu tamakkuninnga takusaqartarluni, taamatut naapitaqarnissaq ilimanannginngingaarakku taamatut qaninaarlugu misigisaqarluni annilaajumerpunga, qatserisartoq Qaanaameersoq David Qujaukitsoq Århusiminngaanniit taama oqarpoq.

David Qujaukitsoq driftslederitut pikkorissartussaanini pissutigalugu maanna Århus Brandskolemiilertussaavoq.

Tigusaasut tillinniartuunnginnerartut, sapaatip-akunneri sisamat tigummigallagassanngortinneqarput.