Tigusarineqartut Aasiannukaanneqassapput
Greenpeacekkormiut sisamat isumannaallisaanermik unioqqutitsisimasutut iserfigeqqusaanngitsumullu isersimasutut unnerluunneqassasut, politiit ilisimatitsissutigaat.
Politiit sakkutuut umiarsuanneersunit ikiorneqarlutik, Greenpeacekkormiunik sisamanik tigusarinninnerat, unnuap qeqqata missaani pivoq.
- Greenpeacekkormiut tigusarineqannginnerminni nivinngaarfimminnit koorimut allamut ikisillugit politiinit qaqinneqarput, politimesteri Bjørn Tegner Bay tusagassiuutinut nalunaarummini oqarpoq.
Timmisartoq qulimiguulik Greenpeacekkormiut umiarsuaannut Esperanzamut, angallassissutitut atorneqartoq, Qeqrtarsuarmi ippassaq arsaarinnissutigineqarpoq.
Timmisartoq qulimiguulik uppernarsaatitut akiligassiinermullu qularnaveeqqusiissutitut atorneqassasoq, politiit ilisimatitsissutigaat.