Tigummigallagaasimasoq pillugu Strasbourgimi aalajangiisoqassaaq
- Meeqqat inuusuttullu pisinnaatitaaffii uani pineqarmata isumaqarpunga pingaaruteqartoq arlaannaanulluunniit attuumassuteqanngitsunit eqqartuussisutigut nalilerneqartariaqartoq. Meeraq inuusuttorluunniit taama sivisutigisumik tigummineqarnera ineriartorneranut sunniuteqaqataasussaavoq, aamma eqqartuussiveqarnikkut siunissami maani sulianut suliaq una sunniuteqassaaq, Juliane Henningsen oqarpoq.
Eqqartuussiviit sulinissaannut malittarisassaanni paragraf 768 immikkoortoq 2 naapertorlugu tigummigallagassat qanoq sivisutigisumik tigummineqarsinnaanersut takuneqarsinnaavoq, immikkulli ittumik pisoqarsimatinnagu inuit 18-iliineqanngitsut sivisunerpaamik qaammatini arfineq-pingasuni tigummigallarneqarsinnaapput.
Toqutsisimasutut pissutissalimmik politiinit pasisaq qaammatini 15-ini maanna tigummigallarneqarsimavoq, taamaalisoqaqqinnginnissaalu maanna anguniarneqarsinnaassasoq, Juliane Henningsenip oqaatigaa:
- Eqqartuussisutigut sumulluunniit attuumassuteqanngitsumit maanna naliliisoqassaaq. Meeqqat inuusuttullu pinerluuteqarsimasut eqqartuussiveqarnikkullu sullinneqartut qanoq sivisutigisumik paarineqarsinnaanerannut oqallinnermut tamanna qitiusorujussuussaaq, Juliane Henningsen oqarpoq.
Angutip inuusuttup qaammatit arfineq-pingasut sinnerlugit tigummigallarneqarsimanera pillugu danskit inatsisinik atortitsinermut ministeria Brian Mikkelsen Juliane Henningsen apeqquteqaateqarpoq, suliarli pillugu oqaaseqartoqarumanani.
Pinerlunnerulli sakkortussusaata eqqarsaatigineqarnissaa matumani tikkuarneqarluni.
Angutip inuusuttup maanna 17-ileerersup eqqartuunneqarnissaa Aalborgimi januaarip 27-ani pissaaq, 85-inik ukiulimmik Gerda Møllerimik toqutsisimanini angutip nassuerutigereerpaa.