Tiguaasut eqqartuussivimmut sassartinneqassapput

Cairn Energyp Skotlandimi qullersaqarfiani "tiguaasut", illersuiniat Greenpeacemeersut 17-it ippassaq tigusaanermik kingorna, Edinburgip eqqartuussiveqarfiani ullumi sassartitaassapput. Aviisimi The Herald Scotlandimi tamanna allaaserineqarpoq.
Allattoq Nauja Møller
juulip 19-at 2011 11:08

Silap pissusaanut illersuiniat 60-it sinnillit, affai sinnerlugit nannutut atukkersorsimasut akerliullutik tiguaanerminni siunertaasa ilagisimavaat Cairn Energyp nunatta imartaani uuliamik maqisoortoqassagaluarpat sillimaniarneq pillugu pilersaarutaata pissarsiarinissaa.

Tuluit Nunaanni aviisimi, Daily Recordimi, allaaserineqartut naapertorlugit illersuiniat Greenpeacemeersut sillimaniarneq pillugu pilersaarut kisiat ujartugarinagu Cairn Energymi sulisunik oqartitsiniaallutik sillimaniarneq pillugu pilersaarut pissarsiariniarsimagaluarpaat.

Skottit nalunaaqutaat malillugu ippassaq ullaakkut arfineq pingasut missaanni allaffissuarmik tiguaaneq aallartittoq ullukkut unitsinneqarpoq.

Tiguanerup kingorna Greenpeacemiit ilisimatitsisutigineqaraluarpoq illersuinit ullunut arlalinnut tiguaanissaminnut naammattumik pissamaateqarlutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq