Tiguaasoq tigusaavoq

februaarip 16-at 2007 08:01

Timmisartumik Afrikami Killermi Mauritaniameersumik ippassaq unnukkut tiguaareerluni Gran Canariamut mitsitsigaluartoq spaniamiut politiivinit maanna tigusaareerpoq.

Timmisartumi issimasut 71-iusut inuttallu arfineq-pingasut tamarmik ajunngillat, naak issimasut ilaat 20-t annikitsumik ajoqusersimanerarneqaraluartut, Spaniami aviisi, El Pais taama allaaserisaqarpoq.

Timmisartoq Gran Canariami Las Palmasimut meqqammersorlu timmisartumik tiguaasoq politiit tigusaraat. Angut marlunnik immeriikkanik illuinnarsuuteqarsimavoq, ingerlaannarli tunniutiinnarluni.

Angut timmisartumik tiguaasoq Frankrigimukaatsinniarsimagaluarpoq, tamaani qimaasutut isernissamik qinnuteqarniarluni, Frankrigimi naalakkersuisunit tusarfik nutaarsiassaqartitsivimmut AFP-mut ilisimatitsivoq. – Taamaammat tiguaasoq peqqarniisaarniaanngilaq, tusarfik aamma oqarpoq.

Timmisartup Las Palmasimut minngitsiarnerani issimasut arlallit tiguaasoq terlinganiit tiguaat, angullu tiguaasoq issimasut ilaattut annikitsuinnarmik ajoquserpoq.