Tigooraaviit marluk pilersinneqassapput

Qeqertarsuarmi Upernavimmilu tigooraavinnik sanaartortoqarnissaanut aningaasaleerusullutik Naalakkersuisut neriorsueqqammerput. Naatsorsuutigineqarpoq 2011-p naannginnerani tigooraaviit sanaartorlugit naammassineqassasut, Qaasutsup Kommunianit nalunaarutigineqarpoq.

Eqqagassat avatangiisinut ulorianaatillit, aamma ’eqqagassanik ulorianartunik’ taaneqartartut, tassaasinnaapput batteriit, uulia, akuutissat ulorianartut, qalipaatit, serpartaalluni qalipaatit (spraydåser) nakorsaatillu.

- Nunatsinni illoqarfiit annerit arfinillit eqqagassanut ulorianartunut tigooraaveqarput – ullumikkulli sumiiffinni arlalinni eqqakkat ulorianartut naammaginartumik suliarineqarsinnaanissaannut pisariaqartunik atortorissaaruteqanngilaq. Qujanartumilli Naalakkersuisut ukiuni aggersuni tigooraaviliortoqarnissaanut aningaasat amerlanerit immikkoortissinnaanissaat naatsorsuutigaat, kommuni nalunaarummini ilaatigut taama allappoq.

Eqqakkat avatangiisinut ulorianaatillit  eqqortumik suliarineqartalernissaat  2014  naatinnagu piviusunngortinniarneqarpoq.