Tibetip tiguarneqarneranit ukiut 50-it qaangiupput

Dalai Lama oqarpoq, Kinamiut tiguaaqqanerat Tibetimiut 100.000-illit inuunerannik akeqarsimasoq, illernartuutitatillu tuusintillit aserorterneqarsimasut. Dalai Lama, maanna 73-inik ukiulik, Indiami qimarnguimmini oqalugiarpoq. Kinamiulli ukiut 50-it matuma siorna Tibetimut isaammata akersuuteqataagaluariarluni Dalai Lama Indiamut qimaavoq.

– Ukiut 50-it kingulliit Tibetimut Tibetimiunullu takorloorneqarsinnaanngitsumik naalliuffiupput, Kinamiullu Tibetimi naalakkersuinerisa kingunerannik inuit qunnermisullilusooq inuupput, Dalai Lama oqarpoq.

Illuatungaannili Kinamiut oqarput Dalai Lama pikitsitseqqusaarisoq. Siorna taamaalinerani Tibetimi sumiiffinni assigiinngitsuni pikitsitsisoqarmat Kina-miut arlallit toqutaapput. Ullunilumi kingullerni aamma pikitsitsisoqallattaareerpoq.

Kinamiut anisillugit Tibetimiut namminersulivinissaat nammineq anguniarnagu, Dalai Lamap oqalugiarnermini erseqqissarpaa. Tibetimili namminersulernermut assigusumik ingerlatsisoqalernissaa kissaatiginerarpaa, taamaalillutik Tibetimiut annerusumik oqartussaaqataalersinnaaniassammata. Dalai Lama sakkortuumik Kinamiunut isornartorsiueriarluni, naapertuilluarlutik sakkulersorniaratillu nunaminni pissaaneqaleqqinnissaminnut anguniagaqarnertik suli neriunartoqarnerarpaa.

Kinamiulli Dalai Lama salluliornerarpaat, taamaammallu Kinap nunanut allanut ministereqarfianiit oqaaseqarfigineqarusunnani.