Tibetimiut Kinamiullu oqaloqatigiinnerat iluatsilluartoq
Tibetip anersaakkut siuttuata Dalai Lamap aallartitaasa Tibetimi eqqissiviilliornerit pillugit Kina-miunik oqaloqateqarnertik iluatsilluartutut nalilerpaat, ataatsimiinneq Dalai Lamamut nalunaarutigineqareeriarpat illuatungeriit naapeqqinnissartik oqaatigaat.
Allattoq Louise M. Kleemann
maajip 06-at 2008 08:26
Dalai Lama sinnerlugu ataatsimeeqataasoq Lode Gyari unnersiorpoq oqallilluarsimallutik attaveqatigiilluarsimallutillu.
- Naapeqqinnissarput isumaqatigiissutigaarput, tamannalu isumalluarnarpoq. Ataatsimeeqatigiinneq pillugu Dalai Lama-mut nalunaaruteqareerutta oqaaseqaammik saqqumiussissaagut, Dalai Lamap aallartitaa Lode Gyari Hongkong-imiit Indiamut aallannginnermini oqarpoq. Tibet-imiut naalakkersuisui qimarngusut Indiami naalakkersuisoqarfeqarput.
Europami naalakkersuisut siuttuisa Kinamiut Dalai Lamamik oqaloqateqarnissaannik kajumissaarinerisa kingornagut Kinamiut ataatsimeeqatigineqarput. Dalai Lama Tibetip namminersornerunissaa kissaatigaa namminersulernissaali anguniarneqarani. Dalai Lama 1959-imili Tibet-imit qimarnguvoq.
