Tibetimiut kamaqisut Nunarput Tibetilu assersuutigaat
- Tibetimiut kalaallisulli inuiaapput. Kalaallit inuttut pisinnaatitaaffii Danmarkip akuerisinnaagunigit tibetimiut inuttut pisinnaatitaaffeqalerusunnerat aamma tapersersussagaluarpaa, Dalai Lamap Europap Avannarpasissuani tapersersortaa, Thubten Samdup, aviisimi Jyllands-Posten-imi issuarneqarpoq.
Danmarkimi ministeriunerup, Lars Løkke Rasmussenip. Dalai Lama upernaaq maajimi naapeqatigaa, naak isumaqatigiissuteqarfigisimanngikkaluarlugu. Kinamiut tamanna paasigamikku iluarinngilaat, ministerit inuussutissarsiortullu aallartitaasa tikeraarlutik ataatsimeeqatigiinnissaralui allaaat taamaatitillugit.
Kina-lli uulia pillugu nalunaarusiaanik taaneqartartumi Danmark decembarip aallartilaarnerani tassa atsiorpoq, Kinalu tassa akueralugu, tassa tibetimiut namminiilivinnissaat tapersernagu.
- Oqareerpugut Kinami politikki ajorinagu, imaanngilarli tibetimiut namminiilernissaat tapersersunngikkipput. Tibetimiulli kulturiat upperisaallu, Tibetimilu namminneq naalakkersuisoqarnissaat, anguniaqataaffigisinnaavarput, Danmarkimi nunanut allanut ministeri, Per Stig Møller, nutaarsiassaqartitsivimmit Ritzauimit issuarneqarpoq.
Taannaluuna Dalai Lamap avammut oqaaseqartartuanit qisuariarfigineqartoq.
- Danmark ilungersunartorsioreeqaaq. Tamannali takusinnaallugu ajuusaarnarpoq, sunnertissimanera malunnarpoq, Kinallu iluatsitsinerata kingunerisinnaavaa Norgitut, Sverigitut Finlanditullu nunanut allanut saassussisarnini ingerlatiinnarai, Dalai Lamap avammut oqaaseqartartua Jyllands-Postenimit issuarneqarpoq.
