Thyge Østergaardip kommuni 2015-imi januaarip 26-anni maalaarutigaa. Ukiut arfinilingajaat qaangiuttut kiisami inaarutaasumik aalajangiisoqangajalerpoq.Assi: KNR.

Thygemut tunngatillugu suliaq: Politikerit kommunip eqqunngitsumik suliaqarnera aalajangiiffigissagaat

Ombudsmandip oqarnera naapertorlugu kommuni Thyge Østergaardip pisortanit ikiorsiissutaanut tassanngaannartumik annikillineqartunut tunngatillugu suliami marloriarluni inatsimmik unioqqutitsivoq. Kommunalbestyrelsip suliami maanna susoqassanera aalajangiiffigisussanngorpaat.

Thyge Østergaardip maalaaruteqarmalli ukiut tallimat qaammatillu qulingiluat qaangiupput. Pisortanit ikiorsiissutimi 1014 konriiniit 775 koruuninut oqarfigeqqaarnani Kommunip tassanngaannartumik ikilimmagit maalaaarpoq.

Maalaaruteqarneralu inaarutaasumik aalajangiiffigineqarnissaanut suli utaqqigallartussaarpasippoq.

Suliarmi politikkikkut ataatsimiititaliani marlunni maanna suliarineqaqqaarluni susoqassanera kommunalbestyrelsip novembarip ulluisa 24-anni aalajangiiffigissavaa.

AAMMA ATUARUK Thygep pisortanit ikiorsiissutisiarisartagai kommunimik peerneqariataartut

Thyge Østergaardip maalaaruteqarnerani suliaq:

  • 2015-imi januaarip 26-at: Thyge Østergaard kommunimit nalunaarfigineqaqqaarnani pisortatinit ikiorsiissutaanut appaasoqarnera pillugu Ombudsmandimut maalaaruteqarpoq. Ombudsmandip maalaarut sulianik tamakkuninnga isumaginnittartumut, Isumaginninnermut Naammagittaalliuteqartarfimmut  ingerlateqqippaa.
     
  • 2017-imi maajip 17-iat: Isumaginninnermut Naammagittaalliuteqartarfiup kommuni kukkussuteqarsimanngitsoq aalajangerpaa.
     
  • 2019-imi novembarip 11-at: Naammagittaalliuteqartarfiup suliaq Ombudsmandip suliamik misissuereerneratigut Kommuneqarfik Sermersuumillu Isumaginninnermillu Naammagittaalliuteqartarfimmik isornartorsiuereerneratigut suliareqqilerpaa.
     
  • 2019-imi decembarip 17-iat: Naammagittaalliuteqartarfiup kommunip aalajangiinera atorsinnaanngitsutut aalajangerpaa. Taamaalilluni kommunip aalajangiinera taamaatinneqarpoq, taamaammallu kommuni nutaamik aalajangiissalluni.
     
  • 2020-mi januaarip 22-at: Kommunip Thyge Østergaardip pisortanit ikiorsiissutai kingumoortumik apparneqassasut aalajangerpaa. Taamaalilluni kommuni nutaamik aalajangiivoq, inernerali taamaaginnarluni – tassa kommuni Thyge Østergaardimut aningaasatinik utertitsissanngilaq.
     
  • 2020-mi septembarip 2-at: Ombudmandi kommunimut aappassaaneerluni isornartorsiuingaatsiarpoq, tamatuma saniatigut Isumaginninnermut Naammagittaalliuteqartarfik kommunip nutaamik aalajangiinera allanngortinneqassasoq aalajangerpaa.

Naak Thyge Østergaardip utaqqinissaa suli sivitsoqqilaaraluartoq, taassuma kommunip suliamik isumaginninnissaanut ulluliisoqarnera ilorrisimaarutigaa.

- Suliap kiisami suliarineqarnera nuannerpoq, tassangaanniit takussavarput Thyge Østergaard oqarpoq.

Suliaq maannamut atorfilittanit suliarineqareerpoq, kommunalbestyrelsillu suliami susoqassanera maanna aalajangiiffigisussanngorpaa, suliarmi suliamut allanut, assingusunut ”tunngaviusumik aalajangiisuulersinnaavoq”.

Marlunnik pisoqarsinnaasoq

Thyge Østergaardimut tunngatillugu suliamut atatillugu marlunnik pisoqarsinnaavoq, kommunimi qanorluunniit aalajangiigaluarpat Inatsisartut Ombudsmandiat suliamik ingerlatitseqqinnissamut piareersimavoq.

Kommunalbestyrelsip kommuni inatsimmik unioqqutitsisimasoq aalajangissappagu kommuni Thyge Østergaardimut qaammatini taakkunani pisortanit ikiorsiissutinik appaassigineqaqqanermini annaasaanik aningaasanik utertitsissaaq.

Taamaattoqassappat Ombudsmandip innuttaasut allat aningaasanik aamma utertitsiffigineqarsinnaanersut misissorniarpai.

AAMMA ATUARUK Thyge pillugu suliaq allanut utertitsinissamut ammaasinnaasoq

Thyge Østergaardimi innuttaasorpassuit kommunalbestyrelsip pisortanut ikiorsiissutinit 5,5 millionit koruuninik sipaaruteqarniarnerani pisortanit ikiorsiissutissarsiassaminnik ukiup 2015-imut nikinnerani appaaffigineqartut ilagiinnarpaat.

Kommunip appaanissaq tamanna innuttaasunut allanut aamma nalunaarutigisimanngikkuniuk kommuni innuttaasunut taakkununnga aningaasanik aamma utertitsisariaqalersinnaavoq.

Kommunalbestyrelilli kommunip inatsimmik unioqqutitsisimanngitsoq aalajangissaguniuk Thyge Østergaardilu aningaasanik utertitsiffigineqanngippat Ombudsmandip Kommuneqarfik Sermersooq eqqartuussivimmut suliassanngortinnissaa piareersimaffigaa.

Kommuni Ombudsmandiluunniit kommunalbestyrelsip novembarip ulluisa 24-anni aalajangiitinnagu suliaq oqaaseqarfigerusunngilaat.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat