Thule-mi saliisimasut qinngornerillu
Amerikamiut sakkutuuisa timmisartuat qaartartunik brintitalinnnik sisamanik usitilluni, 1968-mi Thule-p eqqaani nakkarmat, taamani nakkarfiup nalaani qinngornernik ulorianartunik saliisimasut, ullumikkut nappaatigilersimasaat pillugit kisitsisinik takussutissanik suliarinnittoqalerpoq.
- Ukioq kingulleq EU-mit aalajangerneqarpoq Thule-mi sulisuusimasut pinngitsooratik paasisariaqaraat 1968-mi Thule-mi timmisartorsuaq nakkarmat, qinngornerit ulorianartut suut Thule-mi sulisunit salinneqarsimanersut, maannakkumullu nappaatit toqqutaasimasullu qanoq innersut paasiniarneqartariaqartut, John Borup, Thule-mi sulisuusimasut peqatigiiffianni siulittaasoq oqarpoq nangillunilu.
- Thulemi sulisuusimasut nappaatigilertagaat assigiinngillat. Amerlanerit niumik amiagut kræftimik nappaateqarput, ilagullu allat timimik iluatigut nappaammik kræftimik eqqorneqarsimapput. Kræftimik nappaataannaanngillat aammali nagguakkut nappersimanerit, naarlunnermillu napparsimanerit. Thule-mi sulisuusimasut ilaat 1968-mili timminnernik nappateqalersimapput, ulloq mannalu tikillugu timminneq nappaatigalugu, puakkullu nappaatit takussaanerupput.
Kisitsisinnguilluni misissuiniarnerit ajoriinnagassaanngitsut John Borup, Thule-mi sulisuusimasut peqatigiiffianni siulittaasoq oqarpoq.
- Ajorinngilluinnarparput misissuiniarneq taamaattoq ingerlateqqinneqalermat, siornatigummi taamatut misissuisoqareerpoq. Taamatut misissuiniarneq itisiliinerusumik, ilisimatuunik arlaannaanulluunniit attuumassuteqanngitsunut misissuiniarnermut taarsiinavianngilaq, taamaaliortoqarnissaami kissaatigigaluaratsigu, John Borup, Thule-mi sulisuusimasut peqatigiiffianni siulittaasoq oqarpoq nangillunilu;- Peqqinnissaqarfimmut pisortaqarfik soorunami kisitsisinnguilluni misissuiniartuni misissuiniarli, nappaatigut toqqutigisartakkagullu kisitsisinngorniarligit, kisianni ikiornavianngilaatigut.
John Borup, Thule-mi sulisuusimasut peqatigiiffianni siulittaasoq aamma oqarpoq, Danmarkimi peqqinnissaqarfimmut pisortaqarfik tassungalu attuumassuteqartut tatigivallaarnagit, namminnerlu toqqakkaminnik Danmarkimiunngitsumi immikkut misissuititsiniarlutik oqarput.
John Borup, Thule-mi sulisuusimasut peqatigiiffianni siulittaasoq taama oqarpoq.
