Thule-kulturimeersut najugaqarfigisimasaanni assaanissat akissaqartinneqanngillat

Najugaqarfitoqqat taakku imaanit neriorneqavitsinnagit assaaffiginissaat akissaqarfigineqanngilaq. Taama ajuusaarnartumik ilisimatitsivoq Kalaallit Nunaanni Katersugaasivimmi, pisortaq Claus Andreassen.

Aappaagumut salliutitassatta allassimaffiannut ilaanngilaq, aningaasanik sumiluunniit atorsinnaasatsinnik peqannginnerput tamatumani patsisaavoq, taarsiullugu kitaani qangarnitsanik kingornussat ulorianartorsiortinneqartut salliunnissaat toqqarparput.

Sikup imaaniittup aakkiartornera pissutigalugu ajornartorsiutaavoq. Taamaalilluni mallit akornutissaqanngitsumik sinerissamik neriorsinnaalerput. Thule-kulturimeersuniit kingornussat piginnaarneqassappata, assaasoqarnissaa Nationalmuseumimiit qangarnisarsiuup siunnersuutigaa.

- Assaanermi taama ittumi Kalaallit Nunaata Katersugaasivia siuttuusussaavoq. Aningaasassaqartinneqanngilarli, Claus Andreassen ajuusaarluni oqarpoq.

Najugaqarfiusimasut pingaaruteqartut taama ulorianartorsiortinneqaleraangata kulturimullu tunngasut tammartiteraangata tamatigut aliasunnartarpoq. Taamaakkaluartoq atugassarititaasut taamaattarput suugaluartut tammartarmata.

Aningaasassaqartinneqalerpat nunap qeriuaannartup tammariartornerata aammalu nunap arroriartornerata qangarnitsanit kingornussanut qanoq sunniuteqarnerat misissorneqassasut siullertut siunnersuutigiumavaa. Misissuinerit taama ittut kitaani aallartinneqaqqammerput.

Najugaqarfiusimasut pineqartut ukiut 600-t tikillugit pisoqaassuseqarput.