Thorning: Kalaallit Nunaat tapersersorparput
- Puisinut atatillugu Kalaallit Nunaat Danmarkip tapersersorpaa. Puisinut atatillugu aalajangersimasunik suliniuteqarnerlutik eqqaanngikkaluarlugu, statsminister Helle Thorning-Schmidtip qulareqqunngilaa apeqqummi tassani Danmarkip isummernissaa.
Socialdemokratit ilaat EU-mut eqqusseqqusiunnaaqataanikuummata, Aleqa Hammondip tikkuarpaa, qallunaat EU Parlamentimi ilaasortat tapersersuinissaat aamma Kalaallit Nunaannit pisariaqartinneqartoq.
- EU-mi aalajangeeqataasartut tapersersortiginiartakkatta tapersuinissaat pisariaqarpoq kiisalu inerteqqusiinermi naggueqatigiit Inuit eqqorniarneqannginnerat qanoq uagutsinnut sunniuteqarnersoq paasitittariaqarlutigu, taanna oqarpoq.
Ungasinngitsukkut Inuit immikkoortinneqarneratigut unammillernissamut pissutsinik naligiinngisitsineqarneraalluni WTO-p aalajangiinera, inerteqquseeqqaarnermi Kalaallit Nunaanni puisinik tunisassiornermik ingerlatalinnut sunniutaasunit suli ajornerusumik kinguneqariaannaavoq. Taamaammat apeqqummi tassani qallunaat kalaallillu ataatsimoorutik isummernissaat Aleqa Hammondip neriuutigaa.
- Suliassat tullinnguuttut tassaasariaqarput sutigut tamatigut pitsanngorsaanissaq kiisalu nungusaataanngitsumik puisinniarnermik inuuniutillit naapertuuttumik pissusilersorfigineqarnissaasa qulakkeerneqarnissaat.
WTO-p aalajangigaa Canadap suliassanngorteqqissamaarlugu nalunaarmat nunat marluk taakkua tamanna utaqqimaarallarpaat.
