Thorning: Ippassaq oqallittoqarnera Naalagaaffeqatigiinnut iluaqutaavoq
Kalaallit Nunaata aningaasaqarnera Folketingimi ippassaq oqallisigineqarmat sapaatit akunnerini siuliini danskit politikeriisa akornanni oqallinnermut naleqqiullugu inussiarnernerusumik nipeqarpoq. Oqallittoqarnerani paasinarsivoq partiit tamarmiullutik naalakkersuisut Naalagaaffeqatigiinni suleqatigiinnermik nukittorsaanissaannik kaammattuuteqarfiusumik siunnersuut, ilaatigut Folketingimi ukiumoortumik apeqquteqaatit aallaavigalugit oqallittoqartarnissaanik imaqartoq ilalersimagaat. Siunnersuummi naalaakkersuisut kaammattorneqarput danskit Kalaallit Nunaanni aningaasaliisarnerisa annertusarnissaannik sulissuteqassasut.
Siunnersuullu marlunngorpat akuersissutigineqartussatut naatsorsuutigineqartoq ministeriunermit tigulluarneqarpoq.
- Partiit tamarmiusut ilaasortallu atlantikup avannaaneersut peqataaffigaat, tamannala Kalaallit Nunaata oqallisigineqarnerani oqaluttuarisaanermut pingaarutilittut taaneqarsinnaagunarpoq. Tamannalu iluarisimaareqaara.
Helle Thorning Schmidtip Siumup siulittaasuata Aleqa Hammondip Siumup Naalagaaffeqatigiinnit aninissamik sulissuteqarneranik oqarsimanera aamma Berlingske Tidendemi siullerpaamik oqaaseqarfigaa. Tupaallannartoqannginnerarpaalu;
-Isumaqarpunga Naalagaaffeqatigiinni immikkoorluta ataatsimoorlutalu nukittunerusumik inissisimassasugut, taamaammat maannakkuuinnaanngitsoq aammali ukiuni tullerni arlalinni naalagaaffeqatigiinnitta nukittuujunissaa pingaartippara.
