Thorning: Aningaasaateqarfik kalaallit suliffeqarfiutaannut taarsigassarsisitsisalissaaq
Kalaallit Nunaata aningaasaqarnera pitsaanerulersinneqartariaqarpoq, taamaammat kalaallit suliffeqarfiutaat Ineriartortitsinissamut aningaasaateqarfimmut taarsigassarsisinnaasariaqarput.
Danskit ministeriunerat Helle Thorning-Schmidt (S) Folketingip ataatsimiinnera ullumi marlunngornermi ammarlugu oqalugiarami taama siunnersuuteqarpoq.
Ministeriunerlu oqalugiaammini ilaatigut ima oqarpoq:
- Savalimmiuni Kalaallit Nunaannilu inuussutissarsiuteqartut nukittorsaavigineqarnissaat suleqatigiissutigaarput. Ineriartortitsinissamullu aningaasaateqarfik danskinuinnaq taarsigassarsisitsinani suliffeqarfinnut naalagaaffeqatigiinni tamaneersunut taarsigassarsisitsisalernissaa danskit naalakkersuisuisa siunnersuutigaat.
Aningaaserivinnut qularnaveeqqusiinissamut 40 mio. koruunit
Ineriartortitsinissamut aningaasaateqarfik tassaavoq danskit naalagaaffiata aningaasaliisarfittut aningaasaateqarfia, danskillu suliffeqarfiutaat tassannga taarsigassarsisinnaallutillu suliffeqarfimmik ingerlatsineq pillugu siunnersorneqarsinnaapput. Danskillu naalakkersuisui isumaqarput kalaallit suliffeqarfiutaat aamma taamatut periarfissinneqartariaqartut.
Ineriartortitsinissamut aningaasaateqarfiup pisortaata Christian Motzfeldtip naatsorsuutigaa kalaallit savalimmiormiullu suliffeqarfiutaat tamarmik immikkut 40 mio. koruuninik immikkoortitsissunneqarsinnaassasut. Aningaasat taakku suliffeqarfimmik nutaamik pilersitsinermi aningaaserivinnut qularnaveeqqutissatut atorneqassapput, aningaaseriviillu pingaarnerit tassaassapput Grønlandsbanken aamma Bank Nordic, aningaasaateqarfiup pisortaa KNR-imut oqarpoq.
Aammattaaq suliffeqarfiit suliffeqarfimmut aningaasaliissutissat tamarmiusut affaannut Ineriartortitsinissamut aningaasaateqarfimmit toqqaannartumik taarsigassarsisinnaassapput.
Suliffeqarfiit mikinerit akunnattumillu angissusillit kisiisa pineqarput
Ineriartortitsinissamullu aningaasaateqarfimmit taarsigassarsinissamut suliffeqarfiup sunik suliaqarnissaanut piumasaqaateqanngilaq. Suliffeqarfeeqqat ataasiinnarmik sulisoqartut isumalluarnartunik isumassarsiaqartut aamma taarsigassarsisinnaapput, aningaasaateqarfiup pisortaa Christian Motzfeldt taama nassuiaavoq.
Suliffeqarfiilli akiliisinnaajunnaaqqajaanatillu amigartooruteqarfiusunik naatsorsuuteqassanngillat.
- Suliffeqarfeeqqat suulluunniit ineriartortitsinissamik pilersaaruteqartut aningaasarsiorluarsinnaanissaminnullu tatiginartunik missingersuuteqartut tamaasa pineqarput. Tassaapput suliffeqarfiit 2, 3, 5, 10 imaluunniit 20-nik sulisoqartut millioninillu koruuninik marlussunnit 20-30 millionit koruunit tungaannut pisariaqartitsisut, Christian Motzfeldt oqarpoq.
Danskit naalakkersuisui siunnersuutertik Folketingimi amerlanerussuteqartunut akueritinniartussanngorpaat. Amerlanerussuteqartunillu akuersissutigineqassappat kalaallit suliffeqarfiutaat Ineriartortitsinissamut aningaasaateqarfimmit 2015-imi upernaamit taarsigassarsisinnaagunarput.
