Thomas Vinterberg Oscarinnattoq
Filmiliami ilitsersuisup Thomas Vinterbergip Danmarkimeersup filmiliaa 'Druk', filmini nersornaasisarnermi nersornaatit nuimanersaannik unnuaq Oscarinnappoq.
Thomas Vinterberg Oscarinik nersornaasiinermi Los Angelesimi najuuppoq, nersornaaserneqarninilu tulluusimaarutigeqalugu:
- Nuannaarutigeqaara, nersornaaserneqarnissarami ilimagisimanngikkaluarakku, Thomas Vinterberg oqarpoq.
AAMMA ATUARUK Druk Vinterbergilu Oscarimut innersuunneqartut
Filmip "Druk"-ip immiunneqalernera aallartissimatsiaannartoq Thomas Vinterbergip pania Ida 19-inik ukioqarluni biilimik ajutoornermi ajunaarpoq, Vinterbergilu nersornaaserneqarnermini oqalugiarami oqalugiarnerata ilarujussua Idamut tunngatinneqarpoq, Oscarinnattaamilu paniminut pigitippaa, malunnartumillu tussunnguvoq:
- Filmiliaq immiunneqarmat Idamut eqqaassutitut naggataatigut suliarineqarpoq.
Filmi 'Druk' nunani allani siusinnerusukkut aamma nersorniarneqarpoq. Assersuutigalugu European Film Awardsimi sisamanik nersornaaserneqarpoq. European Film Awards Europap Oscariatut taaneqakkajuppoq.
Tuluit filmilianut nersornaasiuttagaannik BAFTA-mik ukioq manna marsimi aamma nersorniarneqarpoq, filmiliat tuluttut oqaasertalersugaanngitsut akornanni ajugaalluni.
