ThoCon akuerineqanngippat nunat allat aningaasaleerusukkunnaassapput
Nunatta ernganik tunisassiornissami, KNI kisermaassitinneqalissappat, nunatta ernganik tunisassiorniarlutik suliniareersut ilaatigut Greenland Ice Cap Productions, Narsamiittoq uppernassuseerutissasoq, Greenland Ice Cap Productions-imi, siulittaasoq Kaj Egede oqarpoq.
- Qinnuteqaaterput aasaq juulimili nassiussimasarput suliarineqarluni suli naammassineqanngilaq kinguarsartuarneqarlunilu. Maannakkut ThoCon-ip Kalaallit Nunaannut aningaasaliiumassuseqarnerat nungukkiartorpoq uagullu suliffeqarfitta ineriartortinneqarnissaanut tamanna ajortumik kinguneqarsinnaavoq, Kaj Egede oqarpoq, nangillunilu: - ThoCon-ip soqutigisarivaa Kalaallit Nunaanni ineriartortitseqataanissaq, ilaatigut umiarsualiviit pitsanngorsarneqarnissaanut aningaasaleeqataarusuppoq, aammalu erngup nukinganik tunisassiorsinnaanermut soqutiginnillutik. ThoCon-ip qinnuteqaataa pilersaarusiorluagaq itigartinneqassappat, nunat allat Kalaallit Nunaannut aningaasaleerusussinnaassusiat annikilleriarujussuassaaq. Taamaammat neriuppugut ThoCon-ip qinnuteqaataa akuerineqassasoq. Taama oqarpoq Kaj Egede.
ThoCon-ip Greenland Ice Cap Productions-illu pilersaarutaat malillugu Qeqertarsuarmi inunnik 50-nik suilisoqarluni imermik tunisassiulersinnaaneq pilersaarutaasimagaluarpoq, Qeqertarsuulli kommunea siunnersuuteqareerpoq ThoCon-p qinnuteqaataa itigartinneqassasoq.
