VIDEO Thelmap saqqummerniarnissaminut imminut unamminini ajugaaffigaa
Piginnaasat avammut saqqummiunnissaat unamminarsinnaasartoq, Thelmap erinarsukkani ullut pingasut ingerlanerinnaani suliarisimavaa. Thelmalu Islandimi nipilersornermik unamminermini peqataanermini inuttut nammineq anguniagaqarsimavoq.
- Scenemi tusarnaartitsinissami kisimiinnermi annilaanganeq qaangerniarnissaa, annilaanganeq taanna nuannersunngortinniarlugu. Ajunngitsutullu, ajortutuunngitsoq. Annilaangajuaannarsimavunga tusarnaartitsigaangama, ukiut qassit taamaannikuullunga, taanna aamma inuttut assut ajugaaffigivara, Thelma Kajsdóttir Lyberth KNR-imut oqarpoq.
Islandimilu nammineq, guitarilerluni, taalliaminik erinarsorami, videomi takuneqarsinnaasutut, dommerinik isiginnaartunillu tupaallatsitserujussuarpoq. Unammeqqinnissaminullu ingerlaqqippoq.
- Misileeqqaarlunga ingerlaqqinnera assut upperiuminaatsippara, kisianni aamma nuannerluni. Misigisaq iluamik nassuiarsinnaanngilara, immaqa nammineq misigisassaavoq, kisianni nuanneqaaq, tupinnaqaaq, Thelma Kajsdóttir Lyberth KNR-imut oqaluttuarpoq.
Nuummi Thelma naapikkatsigu ilisimaneqalereersimasoq malugisinnaavarput. Tiguartinnartumillu erinarsornera nuannarineqarlualereersimavoq.
- Inuit qisuariaataat assut tupinnarpoq, ilimagiivinngikkaluarakku inuit, ingammik kalaallit, kalaaleqatikka, taama nuannertigisumik qisuariaateqassasut. Tassuuna qujassutissaqaqaanga kalaaleqatinnut, Thelma Kajsdóttir Lyberth KNR-imut oqarpoq.
Thelmap saqqummerniarnissaminut imminut unamminini ajugaaffigaa.
Thelmali suli unammilligassaqarpoq, tassami semifinalemut anngunnissaminut suli periarfissaqarami.