Thailandimi nukappiaqqat qarusummiinnikut tusaamaneqarlualertut

Nukappiaqqat aqqaneq marluk sungiusaasualu siorna qaarusummi uligussaapput.
Assi © : Jittrapon Kaicome / AFP / Ritzau Scanpix
Allattoq Ritzau
juunip 23-at 2019 14:14

 

Thailandimi arsaattartut nukappiaqqat aqqaneq marluk sungiusaasualu qaarusummiit annaanneqarneranit maanna ukioq ataaseq qaangiuppoq.

Taakku amerikamiut aliikkutassiaanni "The Ellen DeGeneras Show"-imik peqataallutik nunarsuarmi angalapput, qaarusummilu sapernusimaneranut tunngasumik atuakkanik marlunnik saqqummersitsisoqarluni. Sulili tusaamaneqarnerulertussanngorput, filmermi "The cave" - ""Grotten" netfliximi ukioq manna takutinneqaqqaartussaavoq.

Nukappissanut inuuneq allannguuteqangaatsiarpoq, taakkummi pissakitsuninngaaneersuupput.

Nukappissat ullumikkut atuarfimminnut uteqqinnikuupput, sungiusaasuallu arsaannermi ilinniarfimmik qaarusuup ungasinngisaani nunaqarfeeqqami Mae Saimi pilersitsivoq.

Nukappissat Thailandip ministeriunerannit isumagilluarneqarlutik illersorneqarlutik ullumikkut ajunngeqaat.

Siorna juunip ulluisa 23-anni nukappiaqqat arsaattartut aqqaneq marluk, aqqaneq marluk 16-illu akornanni ukioqartut , sungiusaasuallu Eakapol Chanthawong qaarusummut pulapput. Sialleqimmat imeq qaffappoq tamarmillu uligussaallutik qaarusummi sapernulerpu.

Kingorna aqqartartunik ujaarineqalerput, ullullu qulit qaangiummata tuluit aqqartartuinit aatsaat nassaarineqarput.

Tamarmik uumasut nassaarineqarput.

Aqqartartut erngerlutik annissuisinnaannginnamik qaarusummut nerisassaannik, imigassaannik nakorsaatissaannillu kilometerinik sisamanik ilorpasitsigisumut pajupput.

Kingorna meeqqat ilisimajunnaarsaatinik tuneriarlugit ataasiakkaarlugit qaarusummiit aqqartartunit annissorneqarput.

Ullullu 18-t qaangiummata tamakkerlugit annissorneqarput.

Ukiup ataatsip qaangiunnera malunnartinniarlugu ullumi sapaammi qaarusuup eqqaani arpatsitsisoqarpoq, aqagu ataasinngornermi nukappiaqqat sungiusaasorti peqatigalugu qaarusuup isaariaani upperisartik qinnutigissavaat annassimanertik qujaniutigalugu.