Thailandimi innuttaasut akerliussutsimik takutitseqattaarput

Thailandimi illoqarfiit pingaarnersaanni Bangkokimi sukannersumik naalakkersuineq ullumi atuutilersinneqarpoq. Tamanna pivoq sapaatip akunnerpassuini inuppassuit akerliussutsimik takutitsisareersullu.
apriilip 07-at 2010 15:47

Akerliussutsimik takutitsineq ullumi aatsaat taama sakkortutigaaq, akerliussutsimik takutitsisut inatsisartut ataatsimiittarfiat saassummassuk.

Pissanganartorsiorneqaqaaq ministerit inatsisartunilu ilaasortat qulimiguullit atorlugit tuaviinnaq qimaasariaqalermata, sakkutuut assiaqutaallutik isumannaallisaasut akerliussutsimik takutitsisunit qaangerneqarmata inatsisartullu ataatsimiittarfiat tikivimmassuk.

Suut tamarmik nakuusernertaqanngitsumik aporaannertaqanngitsumillu pipput, sakkutuut isumannaallisaasut akerliussutsimik takutitsisunik inatsisartut ataatsimiittarfiannut namminermut ingerlanianngitsunik aqqutissiuipput minutsillu 20-t qaangiuttut kalerrisaarereernikkut taakkua nipaatsumik tamaanngaanniit qimagullutik.

Qanorli pisoqarnerata takutippaa danskit 1000-illit feeriartarfinnaavanni eqqissisimanarsimagaluartumi maanna sap. akunnerinit pingasunit sivisunerusumik aaqqiagiinnginnerit qanoq annertusisimatiginersut. Naalakersuisullu Thailandip illoqarfiisa pingaarnersaanni Bangkokimi nunallu immikkoortuini tamatuma eqqaaniittuni sukannersumik naalakkersuisoqalernera nalunaarutigalugu iliuuseqapallapput.

Iliuuseqarnerup kingunerissavaa sakkutuut maannakkuminngaanniit akerliussutsimik takutitsisisunik sakkortunerusumik unataasinnaalissammata, inuinnaat pisinnaatitaaffiisa ilaat atorunnaarsinneqarlutik aamma maannakkuminngaanniit inuit tallimanit amerlanerusut kikkulluunniit katersuuffigisinnaasaanni katersuunnissaat inerteqqutaalermat.

Nunalli ministeriunerata Abhisit Vejjajivap aviisip Bangkok Postip allaatigisaa naapertorlugu nammineq aamma akerliussutsimik takutitsisunit qimaasariaqarsimasup ullumi nuna tamakkerlugu tv-qarfikkut toqqaannartumik erseqqissaatigaa sukannersumik naalakkersuilerneq akerliussutsimik takutitsisut piffissami sivikitsumi sakkortuumik unatarneqartalernerannik kinguneqassanngitsoq.

Kisiannili akerliussutsimik takutitsisunut siuttuusut inatsisitigut malersorneqassapput, naalakkersuisut siuttuat suli ilungersoqisoq oqarpoq.

Akerliussutsimik takutitsisut arfininngormalli Bangkokimi pisiniarfissuit pingaarnersaat tiguarpaat. Ilisarnarluartunik aappalaartunik ilullilerlutik tujuuluaralerlutillu siornatigut ministeriunerusimasoq peersitaq peqquserluttuliortarsimanerminullu eqqartuussaq Thaksin Shinawatra tapersersorpaat. Inatsisartut atorunnaarsinneqassasut nutaamillu qinersisoqarnissaa taakkua piumasaraat, tassami taakkua oqarnerat naapertorlugu inuit tapersersuinerat naalakkersuisunit tapersersorneqanngimmat.