Thailand: Pingasut qaartartumit toqutaapput

Inuit ikinnerpaamik pingasut toqutaapput 75-illu ikiligaallutik, taakkununnga ilaapput nunani allamiut sisamat, suminngaanneernerallu ilisimatitsissutigineqanngilaq.

Bangkokimi takornariat ornigarluartagaanni Silomimiittumi, qimuttuitsut unittarfianni qaartitsinerit pipput.

- Kikkut qaartartumeerinersut suli ilisimaneqanngilaq, suut tamarmik aatsaaginnannguaq pimmata. Aqqusinermiillu qaartartumeeriffigineqartumit inuit qimagussortinneqarput, taamatuttaaq ambulancet sakkutoorpassuillu takussaapput. Taamaakkaluartoq paasissutissanik annertunerusunik suli peqartoqanngilaq. Piffissamilu sivitsortumi akerliussutsimik takutitsisut aappaluttunik atisallit saassussineq taanna assut ajoralugu nalunaarutigaat, arlaannaatigullu attuumaassuteqarfiginnginnerarlugu. Taamaaliortuunatillu naqissuserlugu, Kristina Lund Sørensen isiginnittuusoq taama oqaluttuarpoq.

Sapaatit-akunnerini arlaqaleqisuni akerliussutsimik taakku takutitsereermata, qaartartumeerinerit ullumi pisut Bangkokimi pissutsinut qanoq takutitsinersut apeqqutigineqarmat ima akivoq:

- Sapaatit-akunnerini arlaqalersuni Bangkokimi pisut najummassimanarnerannut qaartartumeerinerit takussutissaapput. Maannakkorpiarlu takusinnaavara eqqannguanniit igeriussisoqartoq, qummoroortartuunersut qaartartuunersulluunniit takusinnaanngilara. Kisianni tassa Bangkokimi pissutsit najummassimanartorujussuupput, pisullu eqqissisimasumik qaanngerniarneqarsinnaanerat takujuminaappoq, najummassimanaqigami.

Qaartartumeerisoqarnerata kinguninngua ministeriunerup Abhisit Vejjajiva-p sillimaniarnermut qullersarititani ataatsimiigiaqquai.

Naalakkersuisut tunuarnissaat aamma qinersisitsinissaat angujumallugu, akerliussutsimik takutitsisut tuusintilippassuit akerliussutsimik takutitsinissaat pinngitsoortinniarlugu naalakkersuisut sakkutoorpassuarnik ataasinngormat illoqarfiup ilaanut tassunngartitsimmatali Bangkokimi pissutsit najummassimanarsipput.