Thailand: Aqqartartoq qaarusummi annaassiniarsimasoq toqusoq

Thailandimi aqqartartup arsartartunik qaarusummit siorna annaassiniaqataasimasup annaassiniarnermini aammigut toqunartoqalersimanini toqussutigaa.

Thailandimi sakkutuut imarsiortut tallimanngornermi taama paasissutissiisut, nutaarsiassaqartitsivik Reuters allappoq.

Sergent, Beiret Bureerak aammigut toqunartoqarnerminik nakorsartinnikuuvoq. Piffissamili kingullermi peqqiilliartuinnarsimavoq, sakkutuut imarsiortut ilanngullugu paasissutissiipput.

Aqqartartoq alla Thailandip avannarpasissuani qaarusummit annaassiniarnermini juunimi 2018-imi aamma toquvoq.

Nukappiaqqat aqqanilinnit 16-inut ukiullit sungiusaasuallu qaarusummit anillassinnaajunnaarsimapput. Taakku qaarusuk alakkarlugu isersimapput, siallingaatsiarnerali pissutigalugu imeq qaffakkaluttuinnarsimavoq.

AAMMA ATUARUK Thailandimi nukappiaqqat qarusummiinnikut tusaamaneqarlualertut

Nukappiaqqat qaarusummit aniguisinnissaannut immikkut ilisimasallit qassiiusut nunanit assigiinngitsuneersut ikiuinissaminnik neqeroorsimapput.

Nukappiaqqat ajunaarsimanissaat aallaqqaammut ernumatigineqaraluarpoq. Aqqartartut ujaasineranni arsartartut tulummit aqqartartumit ullut qulit qaangiuttut nassaarineqarput. Ujaarineqartut qaarusuup qilaaniit imermik isaasumik uumassuteqarsimapput.

Nukappiaqqanut qaarusuup isaariaanit 4 kilometerinik ungasitsigisumi mattussaaqqasunut nerisassat, imigassaat nakorsaatissallu aqqartartunit aqqussuunneqarput.

Tamatuma kingorna nukappiaqqat qaarusummit uligussaasimasumit aniguisinniarneqarnerat annertooq aallartinneqarpoq, aqqartartullu iluamik isigisaqarsinnaasimanatik.

Nukappiaqqat aniguisinniarlugit ilisimajunnaarsinneqaqqaarsimasut annaanniarneranni aqqartartut 90-it missaat peqataapput.