Thailand aamma Cambodia ullumi sorsuutilingajalluinarput
Cambodiamiut sakkutuui orpipassuarni oqaluffitoqqap ukiunik 900-nik pisoqaassusillip, ‘Praevia Tempel-imik taaneqartartup tungaanut Cambodiap Thailandillu killeqarfianniittumut, sikaritsimik pujortataajutigalutik, alapernaarsuipput. Aallaasitik tuiminnut inississimallugit utaqqillutik.
Cambodiap Thailandillu killeqarfianni nuna 5 kvadratkilometerinik annertussusilik oqartussaaffigiumallugu, naalagaaffiit taakku marluk ullumi siusinnerusukkut sorsunnermik aallartitsingajalluinnarput.
Hindut oqaluffiata taassuma aasarli aaqqiagiinngissutaanera sakkortusiartuinnarsimavoq.
Oqaluffitoqaq Cambodiamiut oqaluffigaat, oqaluffilli killeqarfimmi inissisimammat, Thailandimiut Cambodiamiullu illuatungeriillutik oqaluffik eqqaalu piginerarpaat. Taamaariarmat Thailandimiut sakkutuuminnik killeqarfiliartitsipput. Taama pisoqarmat Cambodiap ministeriunera tunuartinneqarsinnaanngitsumik Thailandimut piumasaqaateqarpoq.
- Cambodiami sakkutuut naalagaat piumaffigereerpakka, nunaminertaq pineqartoq nakkutigeqqissaaqqullugu. Nunaminertaq inuunermik akeqassagaluarpalluunniit ilungersuutigissavarput, Cambodiap ministeriunera oqarpoq. Thailandimiullu sakkutuui ulloqeqqartinnagu qimagunnissaannik piumasaqarfigalugit. Aamma piffissaliunneqartoq nallingajaleraalu nalunaarutigineqarpoq, Thailandimiut sakkutuutik tunuartissimagaat.
Taamaalilluni sorsuuttoqalersinnaanera maanna pinngitsoortinneqarallarpoq.
Tamatumali kingornagut Thailandimiut nalunaarput sakkutuutik killeqarfimmit qimagutsinneqarsimanngitsut.
Naalagaaffiit taakku marluk sorsuutilissagaluarpata, Thailandimiut sakkutuuisa Cambodiamiut sakkutuui qanganisaaqisut sapernavianngikkaat oqaatigineqarpoq.
Tamatumunnga taarsiullugu killeqarfiup eqqaani qoqassiisarluni sorsuuttoqalernissaa ilimagineqarnerulerpoq.
