TG: Suliffeqarfiit tusarniarneqarsimaneri eqqarsarnartoqarpoq

Ingerlatsivissuit angisuut pillugit inatsisissatut siunnersuutip suliarineqalinnginnerani, aatsitassarsiornernut attuumassuteqartunut, London Mining-imut aamma Greenland Minerals and Energy-mut, Naalakkersuisut augustip 21-anni tusarniagassatut nassiussaat pillugu, Transparency Greenlandip siulittaasua, Anders Meilvang taama qisuariarpoq.

- Suliffeqarfinnut namminersortunut imaluunniit inunnut ataasiakkaanut taamaattunik nassiussisoqarsimaneranik siornatigut takusaqarnikuunngilanga. Uanili pisumi, suliffeqarfiit pisumut attuumassuteqartut, inatsisissap siunnersuutigineqartup oqaluuserineqarnissaanut tusarniarneqarnissaat siunniunneqarsimavoq, tamannalu tupinnarpoq. Isumaqarpunga oqartussaqarfimmit siunertarineqarsimasoq, aatsitassarsiornermik suliffeqarfiit inatsisissamut sunniisariaqartut, Anders Meilvang taama oqarpoq.

Suliffeqarfissuit aatsitassarsiornermut attuumassuteqartut inatsisissap siunnersuutigineqartup suliarineqarnerani, sooq tusarniarneqassasut Aatsitassarsiornermut Naalakkersuisumut, Ove Karl Berthelsenimut akitinniarsimagaluarparput, taannali ullaaq tamaat ataatsimiimmat oqaaseqartissinnaasimanatigu.

Naalakkersuisut sooq taama periuseqarusussimaneri Transparency Greenlandip siulittaasuata, Anders Meilvangip akisinnaannginnerarpaa, tupigaluguli taama iliorsimaneri.

- Naalakkersuisut sooq taama siunertaqarsimaneri imaaliallaannarlunga akisinnaanngilara, tupigaarali ingerlatsivissuit angisuut inatsississamut taama pingaaruteqartigisumut taamarsuaq sunniuteqarsinnaalertinniarneqarneri, Anders Meilvang oqarpoq.

Naalakkersuisulli ingerlatsivissuarnut tusarniaaqqusineri, ingerlatsivissuit marluusut, tassa Greenland Minerals and Energy-p aamma London Mining A/S-ip akiniarnagit aalajangersimapput. Tamanna pillugu London Miningip tusagassiisartua, Kaj Kleist ima oqarpoq.

- Uangut aallartikkattali oqaatigaarput, Nunatta inatsisai malillugit saviminissarsiorfimmik ingerlatsiniarluta, isumaqarsimanatalu immikkut akuliutinneqassalluta aamma akiliunniarata aalajangersimalluta. Taamaattumik pisariaqarsorisimanngilarput Naalakkersuisunut akissuteqassalluta, London Miningip tusagassiisartua, Kaj Kleist ima oqarpoq.

Greenland Minerals and Energy-p tusagassiinermut pisortaa, Erik Holmsgaard tamanna pillugu maanna oqarseqarsinnaanani KNR-imut oqarpoq.