Teriaq ukiunik 40-nngortorsiorluni inuuissiorpoq

Teriaq qarasaasiami tikkuutitut atortagaq siulleq ukiut 40-t matuma siornagut pilersinneqarpoq. Sananeqaqqaarami qisummik karsiliaavoq marlunnillu assakaasoqarluni. Teriaq Stanford-universitetetimi San Fransiscomiittumi dr. Douglas Engelbartimit takutinneqaqqaarpoq.

Karsitap ledningerujussua terissap pamiuanut assingutillugu aalajangiunneqarpoq terissamik tuluttut mouse-mik taaguuteqarnissaa.

Naallu ullumikkut qarasaasiap teriaasa amerlanersai ledningitaarunnikuugaluartut, terissamik taaguuteqaannarnissaa ilimanarluinnarpoq.

Aviisersuup The Times-ip qarasaasiap teriaa nunarsuarmi atuisartunut sakkut sunniuteqarnerpaat pinngitsoorneqarsinnaannginnerpaallu ilaattut nalilerneqarpoq.

Teriaq ukiut 40-nngorlugit nalliuttoq pilluaqquarput, sulinitsinnimi pinngitsoorsinnaannginnatsigu.